Ձեր վստահելի աղբյուրը

Համաշխարհային մամուլի  և «Կազմակերպված հանցավորության ու կոռուպցիայի հետաքննության նախագծի» կողմից գաղտնազերծված  Ադրբեջանի կառավարող էլիտայի կողմից փողերի լվացման մասին պատմությունը նոր զարգացումներ է ստանում:

Հունգարական «Átlátszó» հետաքննական լրագրողական կազմակերպության կողմից կատարված բացահայտումները լույս են սփռում շուրջ հինգ տարի առաջ Հունգարիայի և Ադրբեջանի իշխանությունների միջև կայացած գործարքի վրա, որի արդյունքում Բաքվին էր արտահանձնվել Հունգարիայում իր պատիժը կրող հայ սպա Գուրգեն Մարգարյանին կացնահարած ադրբեջանցի սպա Ռամիլ Սաֆարովը:

Մասնավորապես, պարզ է դարձել, որ ճիշտ այդ գործարքի կայացման ժամանակահատվածում Ադրբեջանից 7 մլն ամերիկյան դոլար է փոխանցվել հունգարական MKB բանկում բացված հաշվին: Բացահայտված փաստաթղթերը ցույց են տալիս, որ այդ հաշվեհամարը պատկանել է Velasco International ընկերությանը, իսկ փոխանցումն էլ կատարվել է Metastar Invest LLP ընկերության կողմից, որը գաղտանզերծված փաստաթղթերում ադրբեջանական իշխանությունների կոռուպցիոն սխեմայում ներգրավված չորս ընկերություններից մեկն է:

Ավելին, բացահայտումները ցույց են տալիս, որ Velasco International ընկերությունն էլ լինելով օֆշորային ընկերություն, պատկանում է Ադրբեջանի փոխվարչապետ Յաքուբ Էյուբովի որդուն՝ Օրխան Էյուբովին:

Հունգարիայի այն ժամանակվա վարչապետ Օրբանի և Ադրբեջանի փոխվարչապետի միջև սերտ կապերի մասին է վկայում նաև այն հանգամանքը, որ Սաֆարովի արտահանձնումից շատ չանցած 2012 թվականի հունիսին Բաքու կատարած այցի ընթացքում Օրբանին  դիմավորել է հենց Յաքուբ Էյուբովը:

«Átlátszó»-ի կողմից կատարված ծավալուն հետաքննությունը բազմաթիվ փաստեր է գաղտնազերծել, որոնք ուղղակիորեն ապացուցում են Էյոբովների կապը Velasco ընկերության,  Հունգարիայում նրա ծավալած գործունեության, այդ երկրում կատարած մեծ ներդրումների հետ:

Velasco-ի՝ Ադրբեջանի իշխանությունների հետ ունեցած առնչությունների մասին է վկայում նաև այն հանգամանքը, որ այդ ընկերությանը 7 մլն դոլար փոխանցած  Metastar Invest LLP ընկերությունը ներգրավված է նաև Ադրբեջանի հետ կապված մեկ այլ սկանդալային-կոռուպցիոն պատմության մեջ: Մասնավորապես, Metastar Invest-ը նույն այն ընկերությունն է, որը 2.4 մլն եվրո էր վճարել իտալացի պատգամավոր Լուկա Վոլոնտեին Եվրոպայի խորհրդում Իլհամ Ալիևի շահերը ներկայացնելու և Ադրբեջանի օգտին լոբբինգ անելու դիմաց:

Ավելին, գաղտնազերծված փաստաթղթերը ցույց են տալիս, որ Լուկա Վոլոնտեն նաև սերտ կապերի մեջ է եղել Վիկտոր Օրբանի հետ, վերջինիս օգնել է ԵԽ-ում լոբբինգ անել այն ժամանակ հունգարական սահմանադրական խնդրահարույց փոփոխությունների անհրաժեշտության հարցը հիմնավորելու գործում:

Վերոբերյալ փաստերն ուղղակիորեն ցույց են տալիս, որ տարիներ առաջ մարդասպան Ռամիլ Սաֆարովին  արտահանձնելու հունգարական իշխանությունների քայլը արժեցել է 7 մլն ամերիկյան դոլար: Ինչպես հունգարական «The Budapest Beacon» պարբերականն է նշում՝ «ծանր հանցագործություն կատարածին արտահանձնելու հունգարական կողմի իրական նպատակն արդեն հայտնի է»: