Ձեր վստահելի աղբյուրը

Վրաստանում այս գիշեր վթարված հայկական ավտոբուսը ոչ կանոնավոր ուղևորափոխադրումներ է իրականացրել։ Panorama.am-ի թղթակցի հետ զրույցում ասյ մասին  հայտնեցին ՀՀ տրանսպորտի, կապի և տեղեկատվական տեխնոլոգիաների նախարարությունից։

Ավտոբուսը պատկանել է ֆիզիկական անձի՝ ոմն Գոռ Թադևոսյանի։ Այն Երևանից ուղևորափոխադրում էր իրականացնում դեպի ՌԴ Նիժնի Նովգորոդ քաղաք։

Օգոստոսի 18-ին՝ հերթական ուղևորափոխադրումն իրականացնելու օրը, ավտոբուս ուղևորներ նստեցնելու պահին, ընկերությունը տուգանվել է 450 հազար դրամով:

ՀՀ արտաքին գործերի նախարարության մամուլի խոսնակ Տիգրան Բալայանն էլ  «Արմենպրես»-ին հայտնել է, որ ըստ ՀՀ ԱԳՆ ունեցած տեղեկության` ավտոբուսի ուղևորներից 11-ը դիմել են բժշկական օգնության, սակայն մանրամասների դեռևս չեն տիրապետում: «Այս պահին ավելի  ոչինչ չեմ կարող ասել: Երբ լինեն մանրամասներ, կհրապարակենք»,- նշել է Բալայանը:

ԱԻՆ-ից էլ մեզ հայտնեցին, որ առայժմ վթարի մանրամասներին չեն տիրապետում։ Նման դեպքերում, ըստ ԱԻՆ-ի, սովորաբար վրացական կողմը արագորեն տեղեկատվություն է տրամադրում հայկական կողմին, սակայն այս անգամ  չի հաղորդվել։ Հայկական կողմն ինքն է տեղեկություններ ստանալու համար դիմել վրացական կողմին և առայժմ սպասում է դրանց ստացմանը։ Նախարարությունից խոստացան տեղեկատվություն ստանալուն պես հրապարակել այն։

Հիշեցնենք, որ Վրաստանում այս գիշեր բախվել են Mercedes մակնիշի մեքենան և Setra մակնիշի ավտոբուսը։ Նախնական տեղեկությունների համաձայն՝ վթարի մեղավորը եղել է Mercedes-ի վարորդը։