Թեթև արդյունաբերության ոլորտի հայ և ռուս գործարարների երկխոսության համար հարթակ կստեղծվի
ՀՀ տնտեսական զարգացման և ներդրումների նախարար Սուրեն Կարայանը նախօրեին ընդունել է ՌԴ արդյունաբերության և առևտրի նախարարի առաջին տեղակալ Գլեբ Նիկիտինի գլխավորած պատվիրակությանը:
Նախարարության լրատվական ծառայության հաղորդմամբ, Սուրեն Կարայանը և Գլեբ Նիկիտինը քննարկել են երկու երկրների արդյունաբերության ոլորտում համագործակցության հեռանկարները։
ՌԴ արդյունաբերության և առևտրի նախարարի առաջին տեղակալ Գլեբ Նիկիտինն ընդգծել է, որ հայկական կողմի հետ համագործակցությունն իրենց առաջնահերթ ուղղություններից է։
Կողմերն անդրադարձել են գյուղտեխնիկայի ապահովման հարցում ձեռք բերված պայմանավորվածությունների իրականացման ընթացքին։
Նախարար Կարայանը նշել է, որ մեծ է համագործակցության ներուժը հատկապես ռադիոէլեկտրոնիկայի ոլորտում, և անհրաժեշտ է այս ուղղությամբ քայլեր ձեռնարկել։
Սուրեն Կարայանը և Գլեբ Նիկիտինը քննարկել են թեթև արդյունաբերության ոլորտի համագործակցությունը։ Գլեբ Նիկիտինը նշել է, որ այս ոլորտում արդյունավետ կլինի համատեղ արտադրությունների հիմնումը և արտահանումը երրորդ երկրներ։ Կողմերը պայմանավորվել են թեթև արդյունաբերության ոլորտի երկու երկրների գործարարների երկխոսության համար հարթակ ստեղծել՝ քննարկելու համատեղ գործունեության հնարավորությունները գործնական մակարդակում։
Տնտեսական զարգացման և ներդրումների նախարարը ներկայացրել է նաև արդյունաբերողներին առաջարկվող լայն հնարավորությունները՝ ստեղծվող «Մեղրի» ազատ տնտեսական գոտում։
Նախարարը և ՌԴ նախարարի առաջին տեղակալն ընդգծել են դեպի երրորդ երկրներ ընդհանուր արտահանման կարևորությունը։
Հանդիպման ընթացքում Սուրեն Կարայանը, Գլեբ Նիկիտինը և Ռուսաստանի հայերի միության նախագահ Արա Աբրահամյանը քննարկել են նաև հոկտեմբերին Երևանում կայանալիք Եվրասիական գործընկերության միջազգային երկրորդ համաժողովի կազմակերպմանն ու անցկացմանն առնչվող հարցեր, հստակեցվել է համաժողովի օրակարգը։
Լրահոս
Տեսանյութեր
Աշխարհի առաջնությունից առաջ ինձ «подножка տվեց» Սիմոն Մարտիրոսյանը. Փաշիկ Ալավերդյան
