Ձեր վստահելի աղբյուրը

Գերմանիայի հարավի Հերքսհայմ փոքր քաղաքի բողոքական եկեղեցին որոշել է այլևս չօգտագործել սվաստիկայով զանգը` զգուշանալով նեոնացիստների ուշադրությունից: Բի-Բի-Սի-ն գրում է, որ Սուրբ Հակոբի եկեղեցու տրամադրության տակ կա ևս երկու զանգ առանց նացիստական գրառումների, դրանք կշարունակեն օգտագործել:

Զանգը, որն արդեն լռել է, թվագրվում է 1934 թվականով: Նրա վրա սվաստիկա է և գրառում՝ «Ամեն ինչ հայրենիքի համար-Ադոլֆ Հիտլեր»: Մինչև վերջերս զանգը հնչում էր ամեն քառորդ ժամ և փոքրիկ բնակավայրի 700 բնակչի տեղեկացնում էր հարսանիքների և հուղարկավորությունների մասին:

Սկանդալը սկսվել էր ամռանը, երբ եկեղեցում նվագող երաժիշտը պահանջել էր դադարեցնել հնչեցնել այդ զանգը: Օգոստոսին քաղաքային խորհուրդը միաձայն քվեարկել էր, որպեսզի զանգի ճակատագիրը որոշեն փորձագետները: Նրանք պետք է եզրակացություն տային, թե արդյոք հնարավոր է հեռացնել սվաստիկան և գրառումը առանց զանգը վնասելու: Վեճերն այն մասին, թե ինչ անել նացիստական Գերմանիայից մնացած զանգի հետ, հանգեցրել էին քաղաքապետի հրաժարականին: Նա հարցազրույցներից մեկում զանգը պահելուն կողմ էր արտահայտվել, դա առաջացրել էր քննադատության մեծ ալիք՝ ստիպելով լքել քաղաքապետի պաշտոնը: Միաժամանակ քաղաքապետը հայտարարել էր, որ հեռուստառեպորտաժում իր դիրքորոշումը խեղաթյուրված էր: Բեքքերի խոսքով, ինքը միայն մեջբերել էր քաղաքի 95-ամյա բնակչուհու խոսքերը: