Ձեր վստահելի աղբյուրը

«Ավելացված արժեքի հարկի մասին» Հայաստանի Հանրապետության օրենքում փոփոխություն կատարելու մասին օրենքի նախագծի վերաբերյալ Ազգային Ժողովում քննարկման ժամանակ հիմնական զեկուցող, ՀՀ կառավարությանն առընթեր պետական եկամուտների կոմիտեի նախագահի տեղակալ Վախթանգ Միրումյանը նշեց, որ  նախագծի ընդունման պարագայում ավելացված արժեքի հարկի վերադարձ կստանան ոչ միայն ՀՀ-ից ապրանքներ արտահանող անձինք, այլև ՀՀ-ում տնտեսական գործունեություն իրականացնող անձինք, ովքեր իրենց տնտեսական գործունեության առանձնահատկությունից ելնելով ունեն իրենց մատակարարների հարկային հաշիվներում առանձնացված ԱԱՀ գումարներ, և իրենց տնտեսական գործուներությունը արտահանումը չէ։

Նրա խոսքով՝ սա տնտեսական ակտիվությունը խթանելուն ուղղված հերթական քայլն է:

«Այս օրենքների ընդունմամբ 2017 թվականի հուլիսի 1-ից հետո ընկած հաշվետու ժամանակահատվածների համար տնտեսվարող սուբյեկտները 6 ամսվա կտրվածքով, եթե կունենան իրենց մատակարարներին վճարված կամ վճարման ենթակա ԱԱՀ գումարներ, որոնք չեն հասցրել օգտագերծել իրենց տնտեսական գործունեության մեջ կօգտագործեն, կդիմեն հարկային մարմնին և սահմանված ընթացակարգից այդ գումարները հետ կվերադարձվեն այնպես, ինչպես վերադարձվում են արտահանում իրականացնող անձանց»,- մանրամասնեց Միրումյանը։

Նախագծի վերաբերյալ մտքերի փոխանակման ժամանակ «Ելք» խմբակցության պատգամավոր Մանե Թանդիլյանը նշեց, որ նախագիծը ողջունելի է և սա է պատճառը, որ ընդդիմադիր գործիչները կողմ են եղել այս նախագծին, բայց նրա խոսքով՝ իրողությունն իրականում շատ տարբեր է։

«Այն կանխավճարները, որոնք, ըստ էության, վերադարձման ենթական են լինում, դրանք այսպես ասած դառնում են առևտրի առարկա։ Շարունակական պրակտիկա ունենք, որ հարկային տեսուչներն անընդմեջ զանգահարում են տնտեսվարող սուբյեկտներին և ակնկալում կանխավճարներ, այսինքն՝ այս պրակտիկան իրենց 10-օրյա, 20-օրյա, 30-օրյա ժամկետները համալրելու համար երևույթներ են։ Այսինքն՝ ըստ էության, մենք ունենք օրենք, որով հետ ենք ստանալու կանխավճարները, բայց մեր հարկային տեսուչները շարունակաբար զանգահարում են և այս պրակտիկան շարունակվում է։ Այսինքն՝ այն շրջանառու միջոցները, որով նախատեսված է, որ այս օրենքի կիրառումից հետո կմնա տնտեսվարող սուբյեկտի մոտ, պրակտիկայում, դե ֆակտո, չի մնում»,- ասաց Թանդիլյանը։

Պատգամավորի խոսքով՝ գալիս են հարկային տեսուչները, գոյություն ունեցող կանխավճարների չափով գրում որոշակի ակտեր, շատ զարմանում են, որ լինում են տնտեսվարող սուբյեկտներ, որտեղ ակտերը գրել հնարավոր չէ և շարունակական է այն արտահայտությունը, որ «դե եկել ենք, մի բան պետք է գրենք։

«Քանի դեռ այս պրակտիկան չի վերացել, նմանատիպ նախաձեռնությունները մնալու են գեղեցիկ թղթի վրա շարադրված օրենքի դրույթներ»,- հավելեց «Ելք»-ի անդամը։