Ձեր վստահելի աղբյուրը

ՀՀ Ազգային ժողովում այսօր քվեարկության դրվեց նախօրեին քննարկված՝ «Ճարտարապետական գործունեության մասին», «Հանրային ծառայությունների համարանիշի մասին», «Երևան քաղաքում տեղական ինքնակառավարման մասին» «Հավաքների ազատության մասին», «Վարչարարության հիմունքների և վարչական վարույթի մասին» ՀՀ օրենքում փոփոխություններ կատարելու մասին» օրենքի նախագծերը։

Ճարտարապետական գործունեության մասին և կից ներկայացրած օրենքների նախագծերի փաթեթն ընդունվեց առաջին ընթերցմամբ, կողմ քվեարկեց 82, դեմ 11 և ձեռնպահ 1 պատգամավոր։

«Մենք կողմ կքվեարկենք առաջին ընթերցմանը, սակայն շատ անհասկանալի է՝  կառավարության կողմից ներկայացված օրենքի նախագծի վերաբերյալ կառավարության և ԱԺ համապատասխան ստորաբաժանումների կողմից տրված իրավական եզրակացությունների առկայության պայմաններում հանկարծ պետաիրավական հանձնաժողովի նախագահը լուրջ առարկություններ է ներկայացնում հակասահմանադրականության վերաբերյալ։ Ես խնդրում եմ, պարզություն թող մտցվի և մինչև երկրորդ ընթերցումը նոր կտեսնենք ինչ տիպի մարմին է սա»,-ասաց ԱԺ փոխնախագահ Միքայել Մելքումյանը։

«Ելք» խմբակցության պատգամավոր Նիկոլ Փաշինյանն էլ նշեց. «Մենք շատ ենք կարևորում այս օրենքի նախագիծը, երեկ սակայն քննարկման ընթացքում ի հայտ եկան մի շարք որոգայթներ, որոնք այս փուլում այս տեսքով թույլ չեն տալիս կողմ քվեարկել։ «Ելք» խմբակցությունը կքվեարկի դեմ և մենք պատրաստակամ ենք աշխատել օրենքում ի հայտ եկած որոգայթները վերացնելու համար»։

Ազգային ժողովը 68 կողմ, 28 դեմ ձայներով ընդունեց նաև «Հավաքների ազատության մասին օրենքի մեջ լրացումներ և փոփոխություններ կատարելու» մասին հարցն առաջին ընթերցմամբ:

«Ծառուկյան» խմբակցության քարտուղար Վահե Էնֆիաջյանն ասաց, որ այս օրենքի հետ կապված անընդունելի մոտեցումներ կան, այդ պատճառով էլ դեմ են քվեարկելու:

«Ելք» խմբակցության ղեկավար Նիկոլ Փաշինյանը նշեց, որ լուրջ մտահոգությունները, որ ունեին օրենքի հետ կապված, հարակից ու հիմնական զեկուցողները երեկ պաշտոնապես փարատեցին  և «Ելք»-ի պատգամավորները կողմ քվեարկեցին:

Նշենք, որ «ՀՀ ԱԺ կանոնակարգ» օրենքի համաձայն՝ այսօր նաև սպասվում է ՀՀ ԱԺ-Կառավարություն հարցուպատասխան։