Ձեր վստահելի աղբյուրը

ՀՀ ԱԺ «Ելք» խմբակցության պատգամավոր Մանե Թանդիլյանն այսօր խորհրդարանում հարցուպատասխանի ժամանակ հարց ուղղեց վարչապետ Կարեն Կարապետյանին, թե արդյոք գնահատել են ԵԱՏՄ-ում մնալու տնտեսական ռսիկերը։

«Ինչո՞վ է ԵԱՏՄ-ն լավ` դա մեր մակրոտնտեսական ցուցանիշներն են, ի՞նչ կլիներ, եթե ԵԱՏՄ-ում չլինեինք` այդ վերլուծությունը հնարավոր է անել, բայց, ես իրականում չեմ տեսնում այլ շուկաներ, որմենք կորցրել ենք՝ ԵԱՏՄ անդամ լինելով», - պատասխանեց վարչապետը։

Վարչապետն ասաց, որ այս պահին չգիտի այլ շուկաների, որոնց նկատմամբ մենք պակաս ուշադիր ենք՝ ելնելով մեր այսօրվա ներուժից և այնտեղ ջանք չենք կիրառում:

«Ամփոփ հաշվետվությունը երբ որ ներկայացնենք, դուք կտեսնեք թվերը։ Արտահանման աճի տեմպը ԵԱՏՄ ավելի ցածր է, քան Եվրամիություն: Մենք շատ հետաքրքրված ենք և որոշակի քայլեր ենք ձեռնարկում նաև մեր հարևան, բարեկամ Իրանի հետ: Կարծում ենք՝ շատ հետաքրքիր եռակողմ բանաձև ենք ուզում առաջարկել միասին աշխատելու` Թուրքմենստան-Իրան-Հայաստան: Ընդհանրապես այդ շուկաները, որոնք տարբերվում են կլասիկ շուկաներից, նույնպես մեր հետաքրքրությունների դաշտում են։ Կգա՞ պահը, որ ԵԱՏՄ-ից դուրս գանք, թե ոչ, այս պահին մենք նման մտավախություն չենք տեսնում»,- նշեց Կարապետյանը։

Վարչապետը հավելեց, որ իրենք շատ ներդրողների հրավիրում են Հայաստան՝ հետևյալ կերպ. «Ասում ենք,  դուք երբ գալիս եք Հայաստան, մեր երկիրը ոչ թե 3 միլիոնանոց շուկա Է, այլ շատ լավ հարթակ՝ ԵԱՏՄ մտնելու համար»։