Ձեր վստահելի աղբյուրը

Այսօր ավելի քան 180 փաստաբան գործադուլ է անում: Նրանք բողոքում են դատարաններում ապօրինի զննությունների ու խուզարկությունների դեմ: Փաստաբանները նախապես տարածել էին հայտարարություն, որ չեն մասնակցելու այսօրվա դատական նիստերին:

Գործադուլին միացած փաստաբանները հավաք-քննարկում են կազմակերպել, որին ներկա է նաև Փաստաբանների պալատի նախագահ Արա Զոհրաբյանը:

«Արդյոք Հայաստանում կա անհրաժեշտություն դատարաններ մտնող փաստաբաններին առհասարակ զննել: Արդյոք կար որևէ նախադեպ, երբ մի փաստաբան դատարան է ներս տարել ինչ-որ արգելված իր, փորձել է օժանդակել ինչ-որ նախապատրաստող հանցագործությանը կամ այլ իրավախախտմանը: Եղե՞լ է նման ինչ-որ դեպք, որին պետությունը կփորձեր նման կերպ արձագանքեր, այսինքն կանխեր նման երևույթը: Իհարկե, ոչ: Ես կարծում եմ, որ կիրառվող միջոցները, մեթոդները, առհասարակ գործողությունները բացարձակապես հիմնավոր չեն, կամայական մոտեցման արդյունք են»,- քննարկմանն ասաց փաստաբան Երվանդ Վարոսյանը:

Խոսելով կոնկրետ զննության ձևի մասին՝ ինչպես է դա արվում, փաստաբանը նշեց. «Դա արվում է խիստ ստորացուցիչ, խուզարկության պահանջներ են ներկայացնում փաստաբաններին, որին շատ փաստաբաններ, իհարկե, ընդդիմանում են: Փաստաբանները, փաստաբանությունը հասարակության մեջ որոշակի ուրույն տեղ, դեր, նշանակություն ունեցող մարդիկ են, մարդկանց համախմբում է: Վերաբերվել նրանց նման կերպ, կարծում եմ՝ անթույլատրելի է»:

Ինչ վերաբերում է արգելվող իրերի ցանկին, որը հրապարակվեց նախօրեին՝ սահմանված ՀՀ դատարանների նախագահների խորհրդի որոշմամբ, Ե. Վարոսյանն ասաց. «Առհասարակ, վերջին շրջանում գնալով համոզվում եմ, որ ավելի լավ է պետական մարմինները որևէ գործողություն չանեն, քան փորձեն լուծումներ գտնել»:

Փաստաբան Տիգրան Աթանեսյանի կարծիքով, դատարանների նախագահները ուշադիր չեն ընթերցել փաստաթուղթը:

«Երևի  աշխատակազմից ինչ-որ մեկը կազմել է, արագ ընդունել են, երևի  այսօրվանից առաջ պետք էր մի փաստաթուղթ ընդունել: Դա պարզապես «քոմեդի քլաբի» տեքստ է: Պատկերացնում եք, ամբողջ աշխարհով հումոր գնա, որ Հայաստանի դատարաններում  արգելվում է ներս մտցել շյուղեր՝ գործելու համար»,- ասաց փաստաբանը:

Քննարկմանը ներկա Փաստաբանների պալատի նախագահ Արա Զոհրաբյանը նախ ասաց, որ այստեղ է, քանի որ հարգում է գործընկերների որոշումը, չնայած չի միացել բողոքի ակցիային:

«Հարգելիներս, ամեն ինչ անում եմ իմ պատկերացումներով, որ այս հարցը լուծվի: Այնպես չէ, որ ձեր բողոքի ակցիան չի նպաստելու դրան:  Ընդհակառակը, նույնպես փորձում եմ օգտագործել այս հարցը կարգավորելու համար: Քաջ գիտակցում ենք, որ փաստաբանի արժանապատվությունն որևէ մեկը իրավունք չունի արատավորի»,- ասաց Արա Զոհրաբյանը: