Եթե լինի խուզարկության փորձ, այո, դա վտանգավոր երևույթ է. Արա Զոհրաբյան

Իրավունք 13:44 13/09/2017 Հայաստան

Եթե լինի խուզարկության փորձ, այո, դա վտանգավոր երևույթ է. Արա Զոհրաբյան

«Ես կարծում եմ, որ ինչ իրականացվում է, զննություն է»,- լրագրողների հետ զրույցում ասաց ՀՀ Փաստաբանների պալատի նախագահ Արա Զոհրաբյանը՝ խոսելով դատարաններում փաստաբանների նկատմամբ զննությունների ու խուզարկությունների մասին:

Նշենք, որ այսօր 180-ից ավելի փաստաբան գործադուլ են անում՝ բողոքելով դատարաններում ապօրինի զննությունների ու խուզարկությունների դեմ: Գործադուլին միացած փաստաբանները հավաք-քննարկում են կազմակերպել, որին ներկա էր նաև Փաստաբանների պալատի նախագահ Արա Զոհրաբյանը:

Ա. Զոհրաբյանի խոսքով, խուզարկության դեպքում խուզարկողն ինքն է խոչընդոտը վերացնում, ասում՝ պայուսակը բացել, եթե չի բացում, ստիպողաբար բացում է պայուսակը, ստիպողաբար հանում է պայուսակի պարունակությունը:

«Դա է խուզարկությունը: Այդպիսի դեպքին ականատես չեմ եղել, փաստաբաններն էլ այդպիսի դեպքի մասին վկայություն չեն տվել»,- նշեց ՓՊ նախագահը՝ հավելելով, որ եթե լինի խուզարկության փորձ, այո, դա վտանգավոր երևույթ է, դրա դեմ պետք ամբողջ ուժով պայքարել:

«Զննության հետ կապված էլ խնդիրներ կային, Փաստաբանների պալատը դրա մասին խոսել է, ահազանգել, դիմել դատական համակագին: Փաստաբանների պալատը ծայրահեղ միջոցների չի գնում, բայց հավասարակշռված, քայլ առ քայլ փորձում ենք հարցը կարգավորել: Օրինակ՝ չկար արգելված իրերի ցանկ, հիմա կա: Որքանով է հաջող, անհաջող, ես չեմ դատողը: Բայց առնվազն գիտենք, որ կա ցանկ, չկա կարգադրիչի կամայական քմահաճույքը»,- ասաց Արա Զոհրաբյանը:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: