Ձեր վստահելի աղբյուրը

Ավան և Նոր Նորք վարչական շրջանների ընդհանուր իրավասության դատարանում այսօր շարունակվելու էր ՊՊԾ գնդի գրավմանը մասնակցած խմբից 14 անդամների՝  Աշոտ Պետրոսյան, Արայիկ Խանդոյան, Արեգ Կյուրեղյան, Արմեն Բիլյան, Արմեն Լամբարյան, Գագիկ Եղիազարյան, Էդվարդ Գրիգորյան, Մխիթար Ավետիսյան, Պավել Մանուկյան, Սեդրակ Նազարյան, Սմբատ Բարսեղյան, Վարուժան Ավետիսյան, Կարո Եղնուկյան, Խաչատուր Գիչյան, գործով դատական նիստը, սակայն այն հետաձգվեց:

Նիստին չեն մասնակցում գործով որոշ փաստաբաններ: Հիշեցնենք, այսօր ավելի քան 180 փաստաբան գործադուլ են անում: Նրանք բողոքում են «դատարաններում և քրեակատարողական հիմնարկներում ապօրինի զննությունների ու խուզարկությունների դեմ»:

Դատավոր Արտուշ Գաբրիելյանն ընթերցեց փաստաբանների հայտարարությունը, որի համաձայն, այսօր հայտարարում են բողոքի ակցիա՝ պայմանականորեն գործադուլ, հրաժարավելով մասնակցել այսօրվա դատական նիստերին:

«Նման քայլով նպատակ ունենք մեր բողոքն արտահայտել Հայաստանում փաստաբանության հեղինակության և փաստաբանի մասնագիտության՝ իրավապաշտպանության նկատմամբ վերաբերմունքի այնպիսի անհանդուրժելի դրսևորումների դեմ, ինչպիսին է փաստաբանների և նրանց մասնագիտական ու անձնական տիրույթների և պատկանելիքի անձեռնմխելիության նկատմամբ ոտնձգությունները… »,- նշված է փաստաբանների հայտարարության մեջ:

Դատավորն ասաց, որ հայտարարության տակ 183 փաստաբանի անուն է գրված, ստորագրություն՝ միայն փաստաբան Երվանդ Վարոսյանի կողմից:

«Դատարանը փաստաբանների՝ այսօրվա դատական նիստին չներկայանալը դրական չի ընդունում, քանի որ փաստաբանները պարտավոր էին ներկայանալ դատական նիստերին, սակայն չեն ներկայացել, հետևաբար հաջորդ դատական նիստին դատարանը կանդրադառնա նրանց վարքագծին»,- նշեց դատավորը:

Ա. Գաբրիելյանը հայտարարեց, որ հաշվի առնելով այն հանգամանքը, որ, փաստորեն, այսօրվա դատական նիստին մասնակցում է ընդամենը երեք փաստաբան Հանրային պաշտպանի գրասենյակից, իսկ 15 փաստաբան չի ներկայացել, իսկ առանց այդ փաստաբանների  գործի քննությունը չեն կարող շարունակել, այսօրվա նիստը հետաձգում են մինչև սեպտեմբերի 20-ը: