Ձեր վստահելի աղբյուրը

«Մինսկի խմբի համանախագահների մասնակցությամբ Նյու-Յորքում արտգործնախարարների հանդիպումից որևէ ակնկալիք չունեմ»,-այսօր լրագրողների հետ հանդիպմանն ասաց «Մարդկային զարգացման միջազգային կենտրոնի» նախագահ Թևան Պողոսյանը:

Նրա կարծիքով՝ քննարկման թեման լինելու են Վիեննայի և Սանկտ-Պետերբուրգի բանակցությունները կյանքի կոչելու հերթական նախաձեռնությունը՝ համանախագահների կողմից. «Մենք պետք է ուղղակի զարկ տանք մեր գիտությանը, բանակին, ամեն օր որևէ գործողություն անելուց միշտ գիտակցենք, որ պատերազմը չի ավարտվել, և որ մենք ենք միակ տերը այն խնդրի, որ պետք է ապահովենք մեր խաղաղությունը և մեր երկրի անձեռնմխելիությունը»։

Ինչ վերաբերում է բլոգեր Լապշինի արտահանձնմանը՝ նա ասաց. «Այն որ նրան փորձել են սպանել, ճնշումներ են գործադրել, դա գաղտնիք չէր, բոլորս էլ գիտակցում էինք։ Այն բառակապակցությունն էր հետաքրքիր, որ եթե հայեր դուք թուլանաք, ձեզ հետ թուրքերը կամ ադրբեջանցիները կանեն այն, ինչ արեցին հրեաների հետ, Ղարաբաղն էլ կվերցնեն, կգան Երևանում էլ ձեզ կմորթեն։ Սա այն գիտակցությունն է, որ Երևանի անվտանգությունը սկսում է հենց արցախա-ադրբեջանական շփման գծից»։

Լրագրողները հետաքրքրվեցին, թե Լապշինի փաստը օգտագործելու ի՞նչ առիթներ ունի Հայաստանն իր դիվանագիտության մեջ, ի պատասխան ասաց. «Մենք պետք է մեր միջից թոթափենք այն զգացողությունը, թե ամոթ է օգտագործել որևէ առիթ ի նպաստ մեր հայկական շահերի, սրանով պետք է չառաջնորդվենք։ Ցանկացած հնարավորություն պետք է օգտագործենք, մեր շահերն առաջ տանելու համար՝ առանց ամաչելու։ Լապշինի գրածների ոչ միայն տարածումը, այլև նրա մաքսիմալ հնարավորությունները մտցնել բոլոր նախաձեռնություններում»։

Թևան Պողոսյանն անդրադարձավ նաև Հայաստանի՝ ՆԱՏՕ-ի զորավարժություններին չմասնակցելուն. «Ես ուրախ էի Վիգեն Սարգսյանի պատասխանով, հարցին, թե ինչի Հայաստանը չմասնակցեց, նախարարն ասաց, որ ներքին խնդիր է եղել և պաշտպանության նախարարությունը պետք է ամեն ինչ ժամանակին ճիշտ տեղեկացներ հանրությանը»։

«Մարդկային զարգացման միջազգային կենտրոնի» նախագահ խոսքով՝ սա երևույթ է, որը պետք է շատ լավ գիտակցեն բոլոր պետական ինստիտուտները, որ հանրությունն իրավունք ունի իմանալ, իսկ իրենց պարտավորությունների մեջ է թափանցիկ աշխատել և հաշվետու լինել։