Ձեր վստահելի աղբյուրը

Ալ. Սպենդիարյանի անվան օպերայի և բալետի ազգային ակադեմիական թատրոնում այսօր կայանալու է Արաքս Մանսուրյանի ստեղծագործական գործունեության 50-ամյակին նվիրված համերգ: Ելույթ են ունենալու Արաքս Մանսուրյանի ուսանողները՝ Սիդնեյի կոնսերվատորիայից: Ծրագրում հնչելու է Կոմիտաս, Մանսուրյան, «Անուշ» օպերայից Անուշի և Սարոյի արիաները, լինելու է նաև եվրոպական ծրագիր: Համերգի վերջում Արաքս Մանսուրյանը ելույթ կունենա իր ուսանողների հետ՝ կատարելով «Սոնա յար»:

«Իմ ստեղծագործական, բեմական կյանքի 50-ամյակին է նվիրված համերգը, մտածեցի, որ հենց իրենք երգեն այդ երեկո: Ընտրությունն իմն էր, հարցրեցի նրանց, համաձայնվեցին: Հպարտանում եմ, երբ օտարը երգում է հայերեն, դա ինձ համար թունելն անցնելու ու լույս տեսնելու նման բան է»,- լրագրողների հետ հանդիպմանն ասաց Արաքս Մանսուրյանը:

Նա նշեց, որ նախքան հայաստանյան համերգը, երգու համերգով հանդես են եկել Սիդնեյում:

«Ինձ համար մտահոգիչ կետը հայերեն լեզուն էր, որ երգեին հայեցի: Մեր հայերեն տառերը դժվար է իրենց համար, բայց կարևորն այն է, որ ուզում են հասնել, շահագրգռված են, որ երգեն կատարյալ: Շնորհակալ եմ, ուրախ, որ պատրաստ են երգել կատարյալ հայերենով»,- ասաց Արաքս Մանսուրյանը:

Պատասխանելով հարցին, թե ինչպե՞ս է ստացվում, աշխատելով օտար երկրում տարբեր լեզվածմտածողություն ունեցող երիտասարդների հետ, կարողանում եք հասնել հաջողության,  նա նշեց. «Համբերությունն ու սերը իմ լեզվի, երաժշտության հանդեպ օգնում են ինձ լինել համառ, բծախնդիր, իրենց հոգիները հանել: Չինացու, կորեացու համար հայերեն երգելը շատ դժվար է: Ընդհանրապես, հայերեն լեզուն շատ դժվար են սովորում:

Սերը, նվիրումը, իմ լեզվի, երաժշտության հանդեպ ունեցած մեծ, հսկայական հարգանքը և գնահատականը, ինձ տալիս է աշխատանքում համբերություն»:

Ասուլիսին ներկա էին այսօրվա համերգին ելույթ ունեցող երգիչները:

Սոպրանո Ջորջիա Կոկորիսն ասաց, որ իր համար մեծ պատիվ է երկրորդ անգամ լինել Հայաստանում, երգել հայերեն՝ Կոմիտաս, Մանսուրյան, «Անուշ» օպերայից հատվածներ:
«Արաքսը հայերենի նկատմամբ ունեցած իր սերը, կիրքը փոխանցում է մեզ, մենք վարկավում ենք, սովորում: Սովորում ենք աշխարհի լավագույն երգչուհիներից մեկի մոտ»,- նշեց նա:

Երգչուհու խոսքով, իրենք բարձր են գնահատում հայ արվեստը, մշակույթը, որը շատ կարևոր է կապել երաժշտության հետ:

«Եթե այդպես չլինի, չենք կարող արդար ձևով ներկայացնել հայկական երաժշտությունը»,- ասաց Ջորջիա Կոկորիսը:

Բարիտոն Էնդրյու Դիքսոնի խոսքով, Արաքսն ամենաէմոցիոնալ դասախոսն է, ով գոնե մեկ անգամ իրենց լացացրել է աշխատանքի ժամանակը. «Պատճառը՝ որպեսզի կատարելագործենք մեր երգեցողությունը: Ես սկսեցի երգել գեղեցիկ, երբ ծանոթացա Արաքս Մանսուրյանի հետ»:

Նա նաև նշեց. «Արաքս Մանսուրյանի «Կռունկ»-ը ամենախորը երգն է, որ լսել եմ, որի մեջ արտահայտված է հայ ժողովրդի տխրությունը, պատմությունը»:

Սոպրանո Ջուլիետ Մունն ասաց, որ մտովի, տեխնիկապես պատրաստ չէր երգել հայերեն, բայց Արաքս Մանսուրյանը փոխեց իր կյանքը: 

«Երբ երգում եմ Արաքսի հետ, շատ երջանիկ եմ»,- շեշտեց նա:

Տենոր Ջանգ Հոնգ Շինը նույնպես նշեց, որ Արաքսի հետ փոխվել է իր կյանքը. «Հիմա գիտեմ՝ ինչ է գեղեցիկ  երգեցողությունը»: