Ձեր վստահելի աղբյուրը

Հայաստանի զբոսաշրջության զարգացման հիմնադրամի  ղեկավար Արա Խզմալյանի գլխավորած պատվիրակությունն այսօր մեկնել է  Մոսկվա, որտեղ «ОТДЫХ 2017» ամենամյա միջազգային զբոսաշրջային ցուցահանդեսի նախօրեին, Մոսկվայում Հայաստանի Հանրապետության դեսպանության դահլիճում Հայաստանը կազմակերպում է հատուկ միջոցառում։

Զբոաշրջության պետական կոմիտեից հաղորդում են, որ ՀՀ ռազմավարական նախաձեռնությունների կենտրոնը և Հայաստանի զբոսաշրջության զարգացման հիմնադրամը  ՀՀ տնտեսական զարգացման և ներդրումների նախարարության զբոսաշրջության պետական կոմիտեի աջակցությամբ  Ռուսաստանի ողջ տարածքում իրականացնում են լայնածավալ  պրոմո արշավ «Եկեք Հայաստան» (“Let`s Armenia”) խորագրով:

Փակ միջոցառման շրջանակներում Հայաստանից մեկնած 14 առաջատար  զբոսաշրջության ոլորտի մասնագետները 30 րոպեների ընթացքում կներկայացնեն Հայաստանի հիմնական զբոսաշրջային ուղղությունները, կխոսեն (գին-որակ հարաբերակցությամբ) լեռնադահուկային հանգստավայր Ծաղկաձորի մասին, կնշեն Ջերմուկի առողջարանների  առավելությունները, ինչպես նաև կծանոթացնեն հայերի ողջ հնագույն մշակույթին և կենցաղին, կբացահայտեն ևս մեկ՝ ներկաների համար դեռ անծանոթ գինու երկիր:
             
Աղբյուրի փոխանցմամբ՝ երեկոյի ծրագրում կլինի խոհարարական վարպետության դաս Ռուսաստանի հայտնի ռեստորատոր,  հեռուստահաղորդավարուհի Գայանե Բրեյովայի ղեկավարությամբ, գինու համտես և Հայաստանի ներկայացում  Ռուսաստանի սոմելյեի և փորձագետների միության ղեկավար, Ռուսաստանի պատվավոր սոմելյե  և Հայաստանի սոմելյեների և  փորձագետների  ասոցիացիայի նախագահ Արթուր Սարգսյանի կողմից։ Երեկոյի ընթցքում հյուրերը կկարողանան վայելել ազգային պարն ու երաժշտությունը, ինչպես նաև կքննարկեն համագործակցույան բազմաբնույթ  հնարավորությունները: