Ձեր վստահելի աղբյուրը

«Շնորհակալ եմ, որ ընդունեցիք մեր հրավերը, չխնայեցիք ձեր ժամանակն ու նյութական միջոցները, եկաք իրականություն դարձնելու համահայկական այս ամենամեծ  հարթակի  աշխատանքները»,-  «Փոխադարձ վստահություն, միասնականություն և պատասխանատվություն» խորագիրը Հայաստան-Սփյուռք 6-րդ համահայկական համաժողովի բացմանն ասաց ՀՀ սփյուռքի նախարար Հրանուշ Հակոբյանը:

Հայաստան-Սփյուռք 5-րդ համաժողովից անցել է ուղիղ 3 տարի և, նրա խոսքով՝ անցած համաժողովի ընթացքում հնչած առաջարկները, դիտողությունները համակարգվել, դաս-դասվել են, լրացվել Հայոց ցեղասպանության 100-րդ տարելիցի համահայկական հռչակագրի դրույթներին համապատասխան և դարձել Հայաստան-Սփյուռք գործակցության անցած տարիների ուղենիշ:

«Սփյուռքի նախարարությունը, հիմք ընդունելով այդ հարցադրումները, գործակցելով հոգևոր, համահայկական, համայնքային կառույցների, այլ նախարարությունների հետ, մշակել և իրականացրել է բազմաբովանդակ ձեռնարկներ: Աշխատանքները հիմնականում նպատակաուղղվել են՝  ամրացնելու Սփյուռքի կապը Հայրենիքի հետ, աշխուժացնելու երիտասարդության շրջանում հայապահպանության աշխատանքները»,- հայտարարեց Հրանուշ Հակոբյանը:

Նրա գնահատմամբ՝  միասնության առհավատչյան է նաև այս համաժողովը,  որին մասնակցում են ավելի քան 1800 մարդ  71 երկրից. «Ուրախալի է, որ մասնակիցների 35 %-ից ավելին կանայք են, մոտ 20 %-ը կազմում են երիտասարդները: Մեծ թիվ են կազմում գործարարները, մտավորականները, 90-ից ավելին՝  խմբագիրներ, լրագրողներ են»:

Սփյուռքի նախարարը նաև նշեց, որ համաժողովին մասնակցում են հարյուրավոր համահայկական կառույցների ղեկավարներ, համայնքային կազմակերպությունների նախագահներ,   ատենապետեր: Մեծ պատվիրակություններ են ժամանել ՌԴ-ից, ԱՄՆ-ից, Արգենտինայից, Կանադայից, Ֆրանսիայից,    Լիբանանից, Սիրիայից, Իրանից,  Թուրքիայից, Վրաստանից:

Բացի այդ, համաժողովին մասնակցում են տարբեր երկների պառլամենտների հայազգի պատգամավորներ, նախարարներ, տեղական մարմիններում  ընտրվածներ: Առաջին անգամ համաժողովին մասնակցում են Մալայզիայի, Թայլանդի, Սինգապուրի, Ճապոնիայի, Մեքսիկայի, Եթովպիայի, Սուդանի, Մյամարի համայնքների ներկայացուցիչներ:

Հրանուշ Հակոբյանը նշեց, որ համաժողովի օրակարգը խիստ հագեցած է, այն ներառում է Հայրենիքի անվտանգության և պաշտպանության, արտաքին քաղաքականության, տնտեսության զարգացման  և հայապահպանության հիմնախնդիրները:

«Որքանով համաժողովը կլինի կազմակերպված, գործնական և արդյունավետ՝ կախված է այստեղ ներկա  գտնվող  յուրաքանչյուրից: Համոզված եմ, որ ձեր գործնական դիրքորոշումներով, իրատեսական հարցադրումներով, նոր նախագծերով, գաղափարներով կհարստացնեք Հայաստան-Սփյուռք գործակցությունը և կնպաստեք նրա հետագա զարգացմանը»,- ասաց Սփյուռքի նախարարը: