Ձեր վստահելի աղբյուրը

«Խնդիրները, որոնք ընդգրկված են համաժողովի օրակարգում, ունեն ռազմավարական նշանակություն մեր պետականության շարունակական  զարգացման հեռանկարների նախանշման տեսանկյունից»,-ասաց  Արցախի Հանրապետության նախագահ Բակո Սահակյանը Հայաստան-Սփյուռք 6-րդ համաժողովի բացմանն իր ելույթում:

Նրա խոսքով, դրանց համակողմանի քննարկումը, ապագա անելիքների հստակեցումն ու ճշգրտումը պահանջում են համակարգված աշխատանք, իրատեսական ու հավակնոտ ծրագրերի մշակում և իրականացում, առկա ներուժի արդյունավետ օգտագործում:

«Անհրաժեշտ է ընդունել այնպիսի որոշումներ, որոնք, հաշվի առնելով ազգային շահերն ու ժամանակի մարտահրավերները, կնախանշեն մեր հարաճուն առաջընթացը: Մենք ունենք նման համատեղ աշխատանքների արդյունքում նվաճած հաղթանակներ ու ձեռքբերումներ»,-ասաց նա:

Արցախի Հանրապետության նախագահն ընդգծեց, որ բարձր մակարդակով կազմակերպված այս միջոցառումը կարևոր ու պահանջված է համարել ե՛ւ Մայր Հայաստանի, ե՛ւ Սփյուռքի, ե՛ւ Արցախի համար:

«Կարևոր է նաև, որ համաժողովի աշխատանքներին մասնակցում են հայտնի պետական, քաղաքական ու հասարակական գործիչներ, գիտնականներ, վերլուծաբաններ, բարերարներ, տարբեր ոլորտների ներկայացուցիչներ աշխարհի շատ երկրներից: Նման ներկայացուցչական բազմազգ կազմը նաև հանդիսանում է տարբեր ժողովուրդների և պետությունների հետ երկխոսության հաստատման ու ամրապնդման, բարեկամական կապերի զարգացման հարմար հարթակ»,- նշել է Բակո Սահակյանը:

Արցախի Հանրապետության Նախագահը համաժողովի մասնակիցներին մաղթեց հաջող և արդյունավետ աշխատանք, համոզմունք հայտնելով, որ համաժողովն արժանի ներդրում կունենա համազգային խնդիրների լուծման գործում: