Ձեր վստահելի աղբյուրը

«Ինչպես Սփյուռքի նախարարն ասաց՝  այս տարվա Հայաստան-Սփյուռք» 6-րդ համաժողովը  թվով և որակով ավելի լավն է, սակայն զգացականից բացի պետք է նաև գործնական քայլեր ձեռնարկենք»,- այս մասին այսօր «Հայաստան-Սփյուռք» 6-րդ համաժողովում  լրագրողների հետ զրույցում ասաց Կիպրոսի թեմի առաջնորդ, գերաշնորհ տեր Խորեն արքեպիսկոպոս Տողրամաջյանը:

Արքեպիսկոպոսը կարևորեց Հայաստան-Սփյուռք համագործակցությունը, սակայն, ըստ նրա, ուշադրություն պետք է դարձնել նաև Սփյուռքի խնդիրներին:

«Այսօր Սփյուռքը կմաշի, Սփյուռքը ուծացման վտանգի առաջ է, հատկապես նոր սերունդը, որոնք Հայաստանից կարտագաղթեն: Դժբախտաբար նրանց մեջ կտեսնենք հուսախաբություն, անտարբերություն, իրենց հայրենիքից, հայրենասիրությունից հեռու են պահում, կարծես թե նեղված են և կուզեն կապերն ամբողջությամբ խզել հայրենիքից»,- ասաց   արքեպիսկոպոս Տողրամաջյանը:

Ուստի, նա հույս ունի, որ այս համաժողովները պետք է նպաստեն նաև նման խնդիրների լուծմանը: 

«Մենք բոլորս հայեր ենք, պետք է հայրենիքը նույն ձևով սիրենք և մեր անկարելին կարելի դարձնենք հայրենիքը ավելի բարձր դասելու համար: Ուստի կարևոր է՝  ձեռք երկարել Սփյուռքին, Սփյուռքն էլ՝ Հայաստանին, քանի որ այդպես մենք ավելի զորավոր կլինենք: Իմ խնդրանքն ու աղաչանքը հայրենակիցներից այն է, որ մեր երկիրը չպարպենք»,- նշեց Խորեն արքեպիսկոպոս Տողրամաջյանը:

Նրա խոսքերով՝ հայաստանցիները սփյուռքահայերին  ասում են՝ «եթե այդքան սիրում եք հայրենիքը, եկեք  դուք այստեղ ապրեք»,  արքեպիսկոպոս Տողրամաջյանն արձագանքում է՝ «ժամանակը գա, մենք պատրաստ ենք գալ այստեղ ապրելու»:

«Ամեն մեկս մեր առաքելությունն ունենք, կաշխատենք այլ երկրներում և ժամանակ գա մենք կփորձենք ամեն ինչ տալ հայրենիքի համար»,- ընդգծեց նա:

Արքեպիսկոպոսը շեշտեց, որ կարևորը թե ազգային, թե հոգևոր արժեքները բարձր պահելն է: «Պետք է ձեռք-ձեռքի տանք և հայրենիքը, Սփյուռքն ու Արցախն այնպես պահենք, ինչպես պատիվ է բերում հային: Հայրենիքը հայի տունն է, այս հայրենիքը  բոլոր հայության կպատկանի: Մեր սիրտը, մեր կամքը, մեր ուժերը դեպի հայրենիք պետք է փոխադրենք, թեկուզ հեռվում լինենք, բայց մեր կապերը չխզենք: Չեմ կարծում, որ հայրենիքը կարող է մեկին նեղացնել, կարող են անձերը նեղացնել, մենք չպետք է զոհենք հայրենիքը, մենք պետք է ավելին տանք հայրենիքին»,- ասաց Խորեն արքեպիսկոպոս Տողրամաջյանը: