Ձեր վստահելի աղբյուրը

Հայերս շատ ենք հպարտանում մեր մշակութային հուշարձաններով, մասնավորապես եկեղեցիներով, որոնք իրեց ճարտարապետությամբ, հետաքրքիր լուծումներով զարմացնում են շատերին: Այսօր այդ եկեղեցիներից շատերը վերականգնման խիստ կարիք ունեն, շատերը վերականգնվում են: Կան եկեղեցիները, որոնք «վերածվել են» գոմերի՝ գտնվելով կիսաքանդ, բացիթողի վիճակում, առանց վերահսկողության:

«Տարածքներում ունենք նման խնդիր: Նույնիսկ հանձնարարեցինք համայնքների ղեկավարներին ժամանակավոր դռներ դնեն, փակեն, որևէ միջոցառում ձեռնարկեն: Լինում է դեպք, որ գյուղացին, հովիվը չհասկանալով, հոտը բերում, անցկացնում է կողքով, կեղտոտում են»,- Panorama.am-ի հետ զրույցում ասաց մշակույթի նախարարության պատմության և մշակույթի հուշարձանների պահպանության գործակալության պետ Արմեն Աբրոյանը:

Նախօրեին համացանցում տարածվեց Լոռու մարզում գտնվող 12-րդ դարի  Քոբայրավանքի անմխիթար վիճակը ներկայացնող լուսանկար՝ կեղտոտ, կովերը ներսում պառկած: Պարզվեց, մշակույթի նախարարության պաշտոնյան տեղյակ էր այդ լուսանկարից:

«Հուշարձանը վերականգնման է տրված: Կա կապալառու շինարարարական կազմակերպություն: Պայմանագրով այս ընթացքում ինքն է օգտագործող դառնում, փաստացի օգտագործող, կապ չունի ֆիզիկապես այնտեղ է, թե ոչ, իր վրա է դրված պարտավորությունները: Դրա համար համապատասխան խիստ գրություն ենք ուղարկել, պահանջել ենք, որ նման դեպքեր այլևս չկրկնվեն, հետևողական լինեն»,- ասաց Ա. Աբրոյանը:

«Չնայած դրան, մենք մեր տարածքային կառույցներին էլ խիստ զգուշացրել ենք, որ հետևողական լինեն»,- հավելեց նա:

Ինչ վերաբերում է  Քոբայրավանքի վերականգնողական աշխատանքների ավարտին, Ա. Աբրոյանն ասաց, որ այն շարունակական է, երկար տարիներ արդեն ընթանում են աշխատանքները. «Դրանք մասնակի վերականգնումներ են, մասնակի միջամտություններ: Այս տարի սեղանատան վերականգնման, կոնսերվացման աշխատանքներ են տարվում»:

Երեկ ֆեյսբուքում լուսանկար էր շրջանառվում՝ եկեղեցու ներսում պառկած կովեր: Ըստ օգտատիրոջ՝ եկեղեցին Քոբայրավանքն է: Այսօր այդ գրառումը փոխված է սրանով.
«Որպեսզի թյուրիմացություն չլինի, թե Քոբայրի եկեղեցին մաքրվել է իմ հրապարակումներից հետո, մեջբերում եմ մի հատված Հրաչ Մարուքյանի հաղորդագրությունից . «ՖԲ-ում լուսանկար կար կովերը Քոբայրի Սրբավայրում...
Հեղինակը նշում էր, որ 3 ամիս առաջ է լուսանկարել... բայց նոր է տեղադրել...
Նախ նշենք, որ Քոբայրը շինաշխատանքների փուլում է, ունեցել է մի որոշ դադար և կրկին վերսկսել են աշխատանքները մոտ մեկ շաբաթ առաջ:
Նշենք նաև այն, որ մեր պայքարը այս խնդրի վերաբերյալ, սկսել է դեռ տարիներ առաջ, այս մասին բազմաթիվ գրություններ են հղվել` ք. Թումայանի համայնքապետին և ոստիկանական բաժանմունքին, վերջիններիս` զգուշացումներից, անգամ` տուգանքից հետո, մի որոշ ժամանակ անասնատերը հետևել է իր կովերին, այնուհետև` կրկին թողել ինքնահոսի...
Այսօր ևս Քոբայր են այցելել ՊՄՊ աշխատակիցներ Կ. Յոլչինյանն ու Ս. Պեպանյանը, պարզել են, որ շինարարները կրկին վերսկսել են աշխատանքները և նախապես կարգի են բերել Սրբավայրը, իսկ ՊՄՊ աշխատակիցները շարունակել են մաքրման աշխատանքներն ամբողջ համալիրի տարածքում»: