Ձեր վստահելի աղբյուրը

Հայաստանի մանուկներ հիմնադրամը  (COAF) նախատեսում է Հայաստանի  1000 գյուղերում ՍՄԱՐԹ կենտրոններ հիմնել: Այս մասին այսօր «Հայաստան-Սփյուռք» 6-րդ համաժողովի շրջանակներում լրագրողների հետ զրույցում ասաց COAF-ի հիմնադիր, ՍՄԱՐԹ կենտրոնի նախաձեռնող Գարո Արմենը:

Նշենք, որ ՍՄԱՐԹ-ը  կրթական ավան է, որտեղ հանդիպում և հանգուցվում են արվեստը, տեխնոլոգիան, լեզուները, գյուղատնտեսությունը, առողջ, ապրելակերպը, ձեռներեցությունը՝ համեմված ստեղծագործականությամբ:

Գարո Արմենն ասաց, որ  հիմնադրամը Հայաստանում  սկսել է գործել 14 տարի առաջ:

«Հայաստանի գյուղերում երեխաների կարողությունները բարձր են, մենք դա տեսել ենք, սակայն ռեսուրսների բացակայության պաճառով այդ կարողությունները հնարավոր չի լինում օգտագործել»,- ասաց հիմնադրամի ղեկավարը:

Նրա խոսքերով՝ 13-14 տարվա ընթացքում բավականաչափ գործեր են արվել և յուրաքանչյուր գյուղում մեծ առաջընթաց կա: Հիմա, ըստ նրա, նախատեսում են Հայաստանի 1000 գյուղերում ՍՄԱՐԹ կենտրոններ հիմնել:

«Հայ ազգն աշխատասեր է, բայց միայն դա բավարար չէ, պետք է խելացի ձևով աշխատել, դրա համար ուզում ենք այդ ՍՄԱՐԹ կենտրոնների միջոցով  տարածվենք Հայաստանի գյուղերում, և հետագա 10-15 տարիների ընթացքում այդ գործը կատարել: Այդպիսով կարող ենք Հայաստանի գյուղում ապրող հաջորդ սերունդի փրկությունը բերել»,- ասաց Գարո Արմենը:

Ըստ նրա՝ արդեն հաշվարկել են, որ 20 ՍՄԱՐԹ կենտրոն ունենալու համար կպահանջվի 200 մլն դոլար:

«Հարուստ  հայեր կան, որ  այդ գումարը տալով գրպանի տարբերությունը չեն զգա, բայց այդ 200 մլն դոլարը Հայաստանի գյուղերի ու գավառների փրկությունը կարող է լինել: Դրանից զատ, մենք ուսումի, առողջապահության, սոցիալական, տնտեսական զարգացման մոդելները պետք է տարածենք Հայաստանում: Այդ մոդելները արդեն հաստատված են»,- նշեց Գարոն Արմենը:

Նա խոստովանում է, որ այս գործը հեշտ չէ, բայց հնարավոր է իրագործել: