Ձեր վստահելի աղբյուրը

Հայաստանի շուկան բաց է և կարելի է զարգանալ: Այս մասին այսօր «Հայաստան-Սփյուռք» 6-րդ համաժողովում հայտարարեց Հայաստանի արդյունաբերողների և գործարարների միության նախագահ Արսեն Ղազարյանը:

«Հայաստանի զարգացման հիմնախնդիրները» խորագրով թեմատիկ նիստում գործարարն ասաց, որ սփյուռքահայ գործարարները հաճախ են հարցնում, թե ո՞վ է երաշխավորելու Հայաստանում իրենց ներդրումները,  դատաիրավական համակարգն ինչպիսին է, արդյոք ինդիրների դեպքում դատական համակարգն իրենց կպաշտպանի:

«26 տարվա անկախությունից հետո սփյուռքահայերի մոտ նորից տեսնում եմ վախ, սպասումներ, կասկածամտություն Հայաստանի տնտեսության և շուկայի նկատմամբ: Խնդիրներ շատ ունենք, բայց ՀՀ կառավարությունը բավականին լուրջ փոփոխություններ է սկսել: Խնդիրներով է լինելու նաև Հայաստանի ապագան, բայց եթե սպասեք, որ  եվրոպական կամ Միացյալ նահանգների շուկայի օրենսդրություն ենք ձևավորելու, ապա կուշանաք, և կգան ներդրումներ կանեն օտարները»,- ասաց Արսեն Ղազարյանը:

Գործարարը նշեց՝ դեռևս հավակնում են, որ Հայաստանի ներդրումները կլինեն էթնիկ-հայկական ծագում ունեցող գործարար աշխարհից, դրա համար ժամանակին ստեղծեցին Համահայկական առևտրի ցանցը: Մինչդեռ, ըստ նրա, իր համար որպես գործարարի՝ դա էական չէ, կարևորը ներդրումներ լինեն:

«Հնարավո՞ր է  Հայաստանում ներդրում անել, շահույթ ունենալ և զարգանալ, իմ օրինակը ձեզ վկա: Իմ վերջին խոշոր երկու ներդրումներից մեկն արել եմ 2008 թվականի մարտի 1-ին, երբ Երևանում անկայուն քաղաքական վիճակ էր, իսկ մյուսը՝ 2016 թ-ի ապրիլյան պատերազմի օրերին: Արել եմ և գնում եմ առաջ: Ինչո՞ւ դուք  պետք է գաք Հայաստան և այստեղ ներդրում անեք, որովհետև մեզ մոտ շահութաբերության տոկոսը բարձր է, ձեր իմացած շուկաներում այդ շահութաբերությունը չեք ունենա, ինչ Հայաստանում: Ոչ միայն նրա համար, որ մեզ մոտ աշխատուժը թանկ չէ, էներգառեսուրսները տարածաշրջանում համեմատաբար մատչելի են, այլ նրա համար, որ մենք անցումային տնտեսություն ենք: Բացի մի քանի ճյուղերից, որտեղ գերակա դիրք ունեցողներ են հայտնվել, շուկան բաց է և կարելի է զարգանալ»,- ընդգծեց Արսեն Ղազարյանը:

Նա նաև նշեց, որ ի տարբերություն միջին կամ խոշոր երկրների, Հայաստանում  ներդրողներին ապահովում են ոչ միայն օրենսդրությամբ, որը կա, այլ նաև քաղաքական կամքի առկայությամբ: Ըստ նրա՝ վարչապետերը, նախարարները, նախագահը, կանգնած են միջին և խոշոր ներդրումային ծրագրերի կողքին, նույնիսկ ներդրումային ծրագրերին հարկային արտոնություններ են տրամադրվում:

«Այդ իմաստով Ռուսաստանի հայ համայնքի ներկայացուցիչներին, որոնք ոչ պակաս են զգում վարչարարության խնդիրները Ռուսաստանում, ուղղակի հորդորում եմ՝ Հայաստանում ավելի դյուրին է լուծել խնդիրները, նույնիսկ որոշակի կոռուպցիոն ռիսկերի պայմաններում: Եթե նախկինում ես իմ քարոզը կարող էի անել Հայաստանի իմ գործընկերների շրջանում, հիմա ես ցանկանում են դա անել նաև ձեր շրջանում:  Այսօր նաև ԵԱՏՄ-ի անդամակցությունն է ինձ բարոյական իրավունք տալիս ձեզ համոզելու՝ եկեք Հայաստան: Որպես պրակտիկ գործարար, որ այդ գործընթացի մեջ է՝ վստահեցնում եմ, որ կա այդ արտոնյալ ռեժիմը ԵԱՏՄ-ում»,- ասաց գործարարը:

Ըստ նրա՝ այսօր Հայաստանի խնդիրը ոչ թե ապրանքների իրացումն է, այլև արտադրական ծավալները: Նրա խոսքերով՝ գործարարաները չեն կարողանում դրսի պատվերների քանակը ապահովել. «Եկեք գումար ներդրեք և աշխատեք:

Մենք արտադրական ծավալների խնդիր ունենք: Հայաստանն օգտվում է մի շարք ռեժիմներից, այդ թվում՝ GSP, GSP+,  բայց արտահանելու համար ապրանք չունի»,- նկատեց Արսեն Ղազարյանը: 

Այսպիսով, ըստ նրա, ժամանակն է Հայաստանը դիտարկել որպես լուրջ արդյունաբերական ծառայություններ մատուցող հարթակ տարածաշրջանի համար. «Ժամանակն է, որ կարողանանք համոզել արտասահմանի մեր խոշոր ձեռնարկություններին, անհատներին, ժամանակն է Էռնեկյանի փորձը «մտցնենք բոլորի աչքը», որ եկավ, դրեց և զարգանում է: Նրա հետ նաև  մի քանի գործարարներ ևս, բայց դա քիչ է: Եթե 100 Էռնեկյան գա Հայաստան, մենք զարգացման տեմպերով կանցնենք Իսրայելից»,- ասաց Արսեն Ղազարյանը: