Ձեր վստահելի աղբյուրը

«Օրենքի համաձայն՝ հանրային պաշտպան նշանակելու մասին որոշում կայացնում է քրեական վարույթն իրականացնող մարմինը,  տվյալ դեպքում՝ դատարանը: Հանրային պաշտպանի գրասենյակի ղեկավարն իրավունք չունի քննարկել այդ որոշումը, մերժել, որովհետև այդպիսի իրավասություն տրված չէ նրան»,- «Ազատություն» ռադիոկայանի ֆեյսբուքյան ասուլիսում ասաց Փաստաբանների պալատի նախագահ Արա Զոհրաբյանը՝ պատասխանելով օգտատիրոջ դիտարկմանը, թե հանրային պաշտպանն իրավունք չունի որևէ մեկին «զոռով պաշտպանել»:

Նշենք, որ ՊՊԾ գնդի գրավմանը մասնակցած խմբի անդամներից մի քանիսին դատարանի որոշմամբ հանրային պաշտպան է տրամադրվել, թեև ամբաստանյալները դեմ են արտահայտվել: Դատավորի մեկնաբանությամբ, նրանց փաստաբանները չեն մասնակցում նիստերին, այդ պատճառով ներգրավում են հանրային պաշտպաններ:

«Հանրային պաշտպանն ունի դատարանի որոշումը, գնում է  դատական նիստերի դահլիճ, իսկ վստահորդն ասում է, որ չի ցանկանում, որ իրեն պաշտպանի: Այսինքն՝ մի կողմից կա դատական ակտ, մյուս կողմից՝ քրեադատավարական կանոններ, որոնք, մեր կարծիքով, որոշակի  հակասություն են առաջացնում: Օրենսդրական  այսօրվա գործող իրավակարգավորման  պայմաններում հանրային պաշտպանը փակուղու մեջ է,  մի կողմից օրենքը պարտադրում է նրան մնալ դահլիճում և պաշտպանել իր վստահորդին,  մյուս կողմից ինքը վստահորդի հետ կոնտակտ չունի»,- ասաց ՓՊ  նախագահը՝ հավելելով, որ այսօր Փաստաբանների պալատն ամեն ինչ անում է  խնդիրը վերացնելու համար:

«Այսօր Քրեական դատավարության օրենսգիրքը,  ինչպես ասացի, իրար հակասող նորմերով, դատարանն այնպես է կիրառում, որ նշանակված հանրային պաշտանը համարվում է պաշտպան: Ով այդ հասկացողության  դաշտից դուրս է գալիս, դատարանը հանգիստ կարողանում է սանկցիա կիրառել, համարել, որ այդ փաստաբանը հակաօրինական վարքագիծ է դրսևորում: Տվյալ դեպքում դատարանի աչքերով նա պաշտպան է, իսկ Քրեական դատավարության օրենսգրքի 68-րդ հոդվածի համաձայն՝  վստահորդի համաձայնության պահից  է համարվում պաշտպան: Հենց այդ առիթով էլ որոշում կայացրեցինք  դիմել Մարդու իրավունքների պաշտպանին, որպեսզի նա էլ դիմի Սահմանադրական դատարան»,- ասաց Արա Զոհրաբյանը: