Ձեր վստահելի աղբյուրը

Երկար տարիներ Հայաստանի արտաքին քաղաքական օրակարգը թելադրված է երկու հայեցակարգերով՝ Հայոց ցեղաքսպանության միջազգային ճանաչում և Արցախյան հիմնախնդրի կարգավորում: Ինչ վերաբերում է Ցեղասպանության ճանաչման խնդրին,ապա մի շարք երկրների ճանաչմամբ այս աշխատանքը դեռ չի ավարտվել, կավարտվի միայն այն ժամանակ, երբ Ցեղասպանությունը ճանաչի Թուրքիան: «Հայաստան-Սփյուռք» 6-րդ համաժողովում իր ելույթի ընթացքում այս մասին ասաց ԱԺ արտաքին հարաբերությունների մշտական հանձնաժողովի նախագահ Արմեն Աշոտյանը:

Ինչ վերաբերում է Արցախյան հիմնախնդրի կարգավորմանը, ապա, բանախոսի համոզմամբ, մենք խնդիր ունենք համադրել Սփյուռքի կառույցների հետ ջանքերը:

«Միաժամանակ, մեր արտաքին քաղաքական օրակարգը պետք է հագեցած լինի ինտեգրացիոն գործընթացներով, Հայաստանի մասնակցությամբ գլոբալ խնդիրների քննարկումներով: Հայաստանը պետք է ցույց տա, որ ունի բավարար ինտելեկտուալ ներուժ՝ խոսելու ոչ միայն քաղաքական, այլ բազմաբնույթ խնդիրների՝ օրինակ գլոբալ տաքացման, ծնելիության և այլ հարցերի մասին»,- ընդգծեց Արմեն Աշոտյանը:

Հանրապետական գործիչը նաև շեշտեց, որ ապրիլյան պատերազմից հետո բանակցությունների բովանդակությունը փոխվել է:

«Այսօր բանակցություններ են՝ բանակցությունները վերսկսելու մասին: Այսօրվա գործընթացը արժանահավատ միջավայր ստեղծելու գործընթաց է: Կարծում եմ՝ միջազգային հանրությանը և Ադրբեջանին չպետք է ցույց տալ, որ այդ հարցերը չլուծած՝ մենք ուզում ենք անցնել բանակցային սեղանին դրված դետալների քննարկմանը: Այժմ թիվ մեկ խնդիրն է  ստիպել Ադրբեջանին՝ կատարել ստանձնած պարտավորությունները: Բանակցային այսօրվա օրակարգը անվտանգության երաշխիքների ապահովումն է»,- ասաց պատգամավորը:

Արմեն Աշոտյանը վերջում տեղին  համարեց շեշտել, որ ինքը դեմ է քվեարկելու «Ելք»-ի՝ ԵԱՏՄ կազմից Հայաստանի դուրս գալու վերաբերյալ նախագծին: