Ձեր վստահելի աղբյուրը

ՀՀ դատական դեպարտամենտի կողմից կատարվել է ուսումնասիրություն սեպտեմբերի 13-ին մի խումբ փաստաբանների կողմից կազմակերպված «գործադուլի» հետևանքով հետաձգված դատական նիստերի վերաբերյալ: Ֆեյսբուքյան իր էջում գրել է ՀՀ դատական դեպարտամենտի Արարողակարգի և հասարակայնության հետ կապերի վարչության պետ  Արման Խաչատրյանը:

«Սույն թվականի սեպտեմբերի 13-ին ՀՀ դատարաններում քրեական գործերով նշանակված է եղել 118, քաղաքացիական գործերով՝ 886, վարչական գործերով՝ 168 դատական նիստեր: Ընդհանուր առմամբ՝ 1172 դատական նիստեր: Գործադուլի հետևանքով դատական նիստերին չեն ներկայացել թվով 20 փաստաբան:

Նշենք, որ սույն թվականի սեպտեմբերի 13-ին նշանակված թվով 1172 դատական նիստերից փաստաբանների չներկայանալու պատճառով հետաձգվել է ընդամենը 9 դատական նիստ:

Կարծես թե թվերն առավել քան խոսուն են, և իրավամբ զավեշտալի է խոսել գործադուլի արդյունքում տապալված նիստերի ազդեցիկության կամ վճռորոշության մասին անգամ»,- նշված է Ա. Խաչատրյանի գրառման մեջ:

Հիշեցնենք,  սեպտեմբերի 13-ին մի խումբ փաստաբաններ գործադուլ էին անում: Նրանք բողոքում էին դատարաններում ապօրինի զննությունների ու խուզարկությունների դեմ: Փաստաբանները նախապես տարածել էին հայտարարություն, որ չեն մասնակցելու այդ օրը նախատեսված դատական նիստերին: Նշվում էր, որ  գործադուլին մասնակցել է 180-ից ավելի փաստաբան: