Ձեր վստահելի աղբյուրը

Իսրայելը «Foxtrot» ֆիլմը ներկայացնել է «Օսկար» մրցանակաբաշխությանը՝ «Օտարալեզու լավագույն ֆիլմ» անվանակարգում, չնայած այն հանգամանքին, որ ֆիլմը քննադատել է երկրի մշակույթի նախարարը:  Գազետա.ռու-ն, հղում անելով Variety-ին, գրում է, որ Սամուել Մաոզի ֆիլմը յոթ արձանիկ է ստացել  «Օֆիր» կինոփառատոնում, որը «Օսկար»-ի իսրայելական տարբերակն է, ինչպես նաև Վենետիկի կինոփառատոնում արժանացել է «Արծաթե առյուծ»-ի:

«Foxtrot» -ն ինքնատիպ ու պարադոքսալ տրագիկոմեդիա է  ծնողների մասին, ովքեր սգում են զինվոր որդու մահը, և որը ոչ մի ընդհանուր բան չունի արաբա-իսրայելական հակամարտության շահարկումների հետ:

Իսրայելի մշակույթի նախարար Միրի Ռեգևը ներկա չի եղել «Օֆիր» մրցանակաբաշխությանը Կինոյի և հեռուստատեսության իսրայելական ակադեմիայի հետ ունեցած վեճի պատճառով: Բացի այդ, նախարարը «Foxtrot» ֆիլմի դեմ է արտահայտվել: Նա  չի տեսել ֆիլմը, բայց պնդել է, որ այն «պղծում» է Իսրայելի բանակը: