Ձեր վստահելի աղբյուրը

«Ընդհանրապես, Հայաստան-սփյուռք համաժողովները կարևորագույն իրադարաձություն են թե Հայաստանում, թե նրա սահմաններից դուրս գտնվող հայրենակիցների համար: Այդ է վկայում նաև տարեցտարի ընդլայնվող մասնակցության աշխարհագրությունը»,- Հայաստան-սփյուռք համահայկական 6-րդ համաժողովի նիստում ունեցած ելույթում ասաց Հայաստանի Ազգային ժողովի նախագահ Արա Բաբլոյանը:

Նա վստահ է, որ այս համաժողովն ավելի համախմբող, շոշափելի արդյունքների հանգեցնող, համահայկական գործակցությունները խթանող համազգային ձեռնարկ է: Ա. Բաբլոյանի խոսքով, այս համաժողովի կարևոր քննարկումներից մեկը, անշուշտ, վերաբերում էր համահայկական խորհրդի ստեղծման գաղափարին:

«Համոզված եմ, որ ապագա կառույցը կարող է իր ձևով և բովանդակությամբ լիարժեք մասնակից լինել համահայկական միասնական օրակարգի ձևավորման  աշխատանքներին»,- ընդգծեց ԱԺ նախագահը:

Արա Բաբլոյանն ասաց, որ հայրենիքը սփյուռքի հոգևոր անվտանգության գլխավոր երաշխավորն է, սփյուռքը՝ հայրենիքի տարածքային ու տնտեսական անվտանգության ապահովման կարևորագույն աջակիցը և շահառուն:

«Բոլորիս երազանքն է ստեղծել զարգացած, արդար, անվտանգ պետություն: Մենք կառուցում ենք նոր Հայաստան՝ նոր հեռանկարով ու նոր հնարավորություններով: Մենք որդեգրել ենք ժողովրդավարության, կայուն զարգացման ճանապարհը, որից չենք կարող հրաժարվել անկախ որևէ իրավիճակից:

Ակնհայտ է, որ աշխարհում ստեղծված ներկայիս տնտեսական, քաղաքական  վիճակը, սրընթաց ծավալվող իրադարձությունները  պարտադրում են ավելի ճկուն, արագաշարժ լինել, կատարելագործել  քաղաքական, տնտեսական դիվանագիտության գործիքները»,- նշեց Ազգայն ժողովի նախագահը: