Ձեր վստահելի աղբյուրը

Հայաստանի և Սփյուռքի գլխավոր խնդիրներից մեկը եղել և շարունակում է մնալ հայապահպանությունը: Այս մասին այսօր «Հայաստան-Սփյուռք» 6-րդ համաժողովի փակման լիագումար նիստի ընթացքում հայտարարեց  ՀՀ սփյուռքի նախարար Հրանուշ Հակոբյանը:

«Մեր հիմնական խնդիրներից է շարունակում մնալ հայապահպանության հիմնահարցը, քանի որ բոլորս էլ հասկանում ենք, որ փոփոխվող աշխարհում փոքրանում, ուծացվում են հայկական համայնքները: Մասնակիցների հարցադրումներն ու մտահոգություններից մեկն այն է, որ համայնքներում մեր շատ հայրենակիցներ հեռանում են համայնքային կյանքից, չեն մասնակցում համայնքի գործունեությանը և դրանով ուծացման գործընթացն արագանում է»,- ասաց Հրանուշ Հակոբյանը:

Նախարարը նշեց, որ եթե պատասխանատու ձևով, համատեղ շարունակեն աշխատել, ապա  կկարողանան հայկական տիրույթ բերել շատ հայերի: «Մենք ինքնակազմակերպման խնդիր ունենք որոշ համայնքների դեպքում: Խառը ամուսնությունների թիվը գնալով ավելանում է, մայրենի լեզուն կրողների թիվը նվազում է, հայկական դպրոցները և մշակութային կենտրոնները փակվում են, կան երկրներ, որտեղ խնդիրներ կան հայկական մշակութային ժառանգության պահպանման հարցում»,- ընդգծեց նա:

Նրա խոսքերով՝  աշխարհի 118 երկրներում հայկական համայնքներ կան, իսկ դրանք ունեն տարբեր կառուցվածք և տարբեր իրավական կարգավիճակ: Ըստ նրա՝ ունենք քաղաքներ, գյուղեր, որոնք ամբողջապես հայաբնակ են: «Հայերին բնորոշ է օտար միջավայրին արագ ինտեգրվելը և ազգային դիմագիծն ու ազգային կերպարը  պահելը: Հայերը կարողանում են շատ արագ ինտեգրվել այլ երկրների հասարակական և տնտեսական կյանքին՝  պատիվ ստեղծելով հայ ազգի, Հայաստանի համար: Դրա համար շնորհակալ ենք Ձեզ՝ ձեր գործունեության և աշխատանքի համար»,- նշեց  Հրանուշ Հակոբյանը:

Սփյուռքի նախարարը նաև հայտնեց, որ հայկական սփյուռքում ունենք 829 համայնք, 30 հազար հայկական կազմակերպություն, 38 համահայկական կազմակերպություն, 724 գործող եկեղեցիներ և վանքեր, հազարից ավելի  մեկօրյա և ամենօրյա դպրոցներ, 637 մշակութային կենտրոն: «Մենք հզոր կառուցվածքային միավորներ ունենք, որոնք ստեղծվել և գործում են հենց հայապահպանության համար, իսկ հայապահպանության գլխավոր զենքը մեր երիտասարդությունն է»,- նշեց Հրանուշ Հակոբյանը:

Անդրադառնալով  համաժողովին՝ Սփյուռքի նախարարն ասաց, որ համաժողովի արդյունքները թույլ են տալիս արձանագրել, որ հիմնական մասնակիցները գոհ են աշխատանքներից:

Նրա խոսքերով՝ չորս հիմնական ուղղություններով 16 թեմատիկ նիստերի ընթացքում ելույթ են ունեցել 102 հոգի, հարցերով, հարցադրումներով, առաջարկություններով իրենց դիմել են 168 հոգի: «Ասելիք ունեին բոլորը, բայց ժամանակի սղությամբ պայմանավորված չկարողացան հնչեցնել իրենց ասելիքը»,- ասաց Հրանուշ Հակոբյանը և համաժողովի մասնակիցներին կոչ արեց առաջարկներ, դիմումներն ու հարցադրումները ուղարկել Սփյուռքի նախարարություն, որը կտեղադրեն նախարարության կայքում:

Նախարարը նաև ներողություն խնդրեց մասնակցիներից՝ շոգ եղանակի համար: «Սակայն մենք որոշում ենք, Աստված տնօրինում է, ներողություն եմ հայցում շոգ եղանակի համար, սեպտեմբերի 18-19-ը երբեք այսքան շոգ չի եղել, պատճառն այն է, որ ձեր ջերմությունն է միացել շոգերի ու չգիտենք՝ ինչ անենք», - նշեց նախարարը: