Ձեր վստահելի աղբյուրը

«Բազմիցս նշում են այն մասին, որ Իրաքյան Քուրդիստանի անկախության հանրաքվեն կարող է էլ ավելի ապակայունացնել իրավիճակը տարածաշրջանում: Նման տեսակետը, կարծում եմ, որոշ չափով անտեսում է  իրականությանը»,-լրագրողների հետ հանդիպմանն ասաց ԵՊՀ միջազգային հարաբերությունների և դիվանագիտության ամբիոնի վարիչ, ԵՊՀ հայ-քրդական առնչությունների բաժնի վարիչ Վահրամ Պետրոսյանը, ով նոր է վերադարձել Իրաքյան Քուրդիստանից, որտեղ հանդիպել է Քուրդիստանի ռեգիոնալ կառավարության տարբեր գործիչների հետ:

Նրա խոսքով, ըստ էության, տարածաշրջանում առանց այն էլ անկայուն իրավիճակ է, պատերազմ է ընթանում «Իսլամական պետություն» ահաբեկչական խմբավորման դեմ, պատերազմի հիմնական, լուրջ դերակատարներից մեկը, ԻՊ դեմ պայքարող ուժը նաև քրդականն է:

Վ. Պետրոսյանը նշեց, որ տարածաշրջանում վերակառուցումը ենթադրում է թե աշխարհաքաղաքական, թե աշխարհատնտեսական լուրջ վերափոխումներ, իսկ քրդերը գործոն են, Իրաքյան Քուրդիստանը՝ առավել ևս: Նա ասաց, որ այս հարցում կարևոր է Թուրքիայի դիրքորոշումը, սեպտեմբերի 22-ին կգումարվի Թուրքիայի անվտանգության խորհրդի նիստ, որտեղ կհստակեցվի վերջնական դիրքորոշում Իրաքյան Քուրդիստանի հանրաքվեի դեպքում:

«Եթե հարևան երկրներն առաջ են քաշում, որ հանրաքվեն հետաձգվի, Թուրքիայի կառավարությունը ձգտում է, որ այն ընդհանրապես չեղյալ հայտարարվի: Գտնում են, որ չեղյալ հայտարարումն է բացառում սպառնալիքը, հետաձգումը ենթադրում է սպառնալիքի պահպանում»,- ասաց Վ. Պետրոսյանը:

Ինչ վերաբերում է այլ երկրների դիրքորոշումներին, նա նշեց, որ ամերիկյան կողմը մինչև օրս ունեցել է և շարունակում է ունենալ բավական լուրջ հակազդեցության դիրքորոշում, նշում են, որ իրավունք ունեն ինքնորոշման, սակայն ճիշտ ժամանակը չէ, ԻՊ դեմ  պայքարն ավելի կարևոր է, քան հանրաքվեն: Առավել ծայրահեղ մոտեցում ունի Իրանը, կտրուկ դեմ է  անկախության հանրավքեին, առավել դրական դիրքորոշում ունի Իսրայելը:

Միաժամանակ նա շեշտեց. «Անկախության հանրաքվեի անցկացումն ու անկախության հռչակումը տարբեր իրողություններ են: Անկախության հանրաքվեից հետո էլի ժամանակ է պահանջվելու, նույնիսկ եթե հռչակվի, քանի որ ռեգիոնալ կոնտեքստում դժվարին գործընթաց է սպասվում»: