Ձեր վստահելի աղբյուրը

«2018-ին լրանալու է Ցեղասպանությունների մասին ՄԱԿ-ի կոնվենցիայի 70-ամյակը: Ժամեր առաջ Հանրապետության նախագահը ՄԱԿ-ի ամբիոնից հայտարարեց, որ մենք հանդես ենք գալու նոր նախաձեռնություններով»,-«Հայաստան-Սփյուռք» 6-րդ համաժողովում հայտարարեց ԱԳ փոխնախարար Շավարշ Քոչարյանը՝ անդրադառնալով  ՀՀ նախագահի հայտարարությանը: 

Նա հիշեցրեց, որ 2015 թվականին ՄԱԿ-ի կողմից  դեկտեմբերի 9-ը հռչակվեց որպես Ցեղասպանության զոհերի հիշատակի և արժանապատվության օր:

«Այդ տեսակետից մենք Հայոց ցեղասպանության միջազգային ճանաչման արդար գիծը տանելով՝ միաժամանակ ընկալվում ենք որպես առաջամարտիկ ցեղասպանությունների կանխարգելման գործում: Դա չափազանց կարևոր է՝ հաշվի առնելով այն իրադարձությունները, որոնք տեղի են ունենում Մերձավոր Արևելքում, որտեղ մենք տեսնում են  ցեղասպանության քաղաքականության բացահայտ դրսևորումներ՝ ուղղված ազգային ու կրոնական փոքրամասնությունների դեմ»,-ասաց նա:

Անդրադառնալով Թուրքիայի կողմից Հայոց Ցեղասպանության ճանաչման ու հայ-թուրքական սահմանի բացման հարցերին, Շ. Քոչարյանը մեջբերեց Թուրքիայի խորհրդարանի հայազգի պատգամավոր Կարո Փայլանի խոսքերը՝ «Դրանց լուծումն անցնում են Թուրքիայի ժողովրդավարացման ճանապարհով»:

ԱԳ փոխնախարարը նկատեց, որ Թուրքիան այսօր ժողովրդավարացման ճիշտ հակառակ ուղիով է ընթանում:

«Պատահական չէ, որ ցյուրիխյան արձանագրությունները տապալվեցին: Դա համընկավ այն ժամանակահատվածի հետ, երբ Թուրքիան սկսեց շեղվել Եվրոպա գնալու համար որդեգրած ուղուց և սկսեց գնալ ըստ էության բռնապետական ճանապարհով»,-ասաց ԱԳ փոխնախարարը, ավելացնելով, որ այդ ամենը  հանգեցրեցին ՄԱԿ-ում ՀՀ նախագահի հայտարարությանը: