Ձեր վստահելի աղբյուրը

«ՄԱԿ-ում ՀՀ նախագահի հայտարարությունը՝ հայ-թուրքական արձանագրություններն առ ոչինչ ճանաչելու վերաբերյալ գտնվում են այն տրամաբանական շղթայի մեջ, որը Հայաստանը կիրառել է արաձանագրությունների ստորագրումից և առաջ, և հետո»,-Panorama.am-ի հետ զրույցում նման կարծիք հայտնեց թուրքագետ, ԵՊՀ արևելագիտության ֆակուլտետի դեկանի տեղակալ Ռուբեն Մելքոնյանը:

Նա հիշեցրեց, որ հայկական կողմը միշտ էլ հայտարարել է՝ արձանագրությունները ստորագրվում են, որպեսզի տարածաշրջանում թուլանա լարվածությունը և երկու երկրների միջև հաստատվեն դիվանագիտական հարաբերություններ: Հստակ հայտարարվել էր, որ ղարաբաղյան խնդիրն ու Հայոց Ցեղասպանության ճանաչման հարցը չպետք է կապել այդ արձանագրությունների հետ:

«Հետագայում Թուրքիայի ապակառուցողական քայլերի հետևանքով Հայաստանը նույնպես ստիպված եղավ մի քանի անգամ կոնկրետ քայլեր ու հայտարարություններ անել: Հիշենք Սահմանադրական դատարանի հայտնի որոշումը՝ արձանագրությունների մեկնաբանման հետ, ՀՀ նախագահի կողմից արձանագրությունների սառեցման գործընթացը ԱԺ-ում: Սրա տրամաբանական հաջորդ քայլն այն է, ինչ ՀՀ նախագահն ասեց իր հայտարարության մեջ»,-ասաց նա, ավելացնելով, որ ժամանակն արդեն սպառված է:

Նա կասկածում էր, որ Թուրքիան որևէ քայլեր կանի հայ-թուրքական արձանագրությունների հետկանչը կանխելուն ուղղված:

«Եթե նման քայլեր չարվեն, ապա սառեցված արձանագրությունները համարվելու են առ ոչինչ: Դա կլինի նաև Թուրքիայի ապակառուցողական այս ողջ գործընթացի համարժեք պատասխանը: Միաժամանակ ամբողջ աշխարհին ի ցույց կդրվի, որ Հայաստանը հետևողական ու համբերատար իրականացրեց քայլեր, սակայն դիմացի կողմի ապակառուցողական պահվածքի պատճառով այս գործընթացը տապալվեց»,-ասաց դեկանի տեղակալը:

Ռ. Մելքոնյանի համոզմամբ, այս գործընթացից Հայաստանը միանշանակ դուրս է գալիս որպես շահող:

«Ըստ էության Հայաստանն ամրապնդեց իր դիրքը միջազգային ասպարեզում՝ որպես պատասխանատու գործընկեր: Դրա փոխարեն ի ցույց դրվեց Թուրքիայի հայտարարությունների ու գործողությունների հակադիր բնույթը:  Ի ցույց դրվեց նաև այն, որ Հայաստանը կողմ է տարածաշրջանում լարվածության թուլացմանը քաղաքակիրթ մեթոդներով, ինչը փաստորեն ընդունելի չէ թուրքական կողմի համար»,-ասաց թուրքագետը: