Ձեր վստահելի աղբյուրը

«Ես այդպիսի տարածքներ չգիտեմ դեռ»,- «Եռաբլուր» զինվորական պանթեոնում լրագրողների հետ զրույցում ասաց ՀՀ ԶՈՒ Գլխավոր շտաբի պետ Մովսես Հակոբյանը՝ պատասխանելով  հարցին, թե վերջերս ՀՀ ԱԳ նախարար Էդվարդ Նալբանդյանը խոսել է տարածքների վերադարձի հնարավորության մասին, ասել է, որ խոսքն այն տարածքների մասին է, որոնք Հայաստանի, Արցախի անվտանգությանը սպառնալիք չեն ներկայացնում, այդ ի՞նչ տարածքներ են:

Նա նշեց, որ այսօր Արցախում ստեղծված է այնպիսի մի պաշտպանության համակարգ, որի խաթարման դեպքում Արցախի անվտանգությունը լուրջ սպառնալիքի տակ կլինի. «Որևէ տարածքի վրա պաշտպանության համակարգի խաթարումը լուրջ անվտանգության սպառնալիք կստեղծի Արցախի Հանրապետության համար: Ավելին ասեմ՝ մեզ ավելի լավ տարածքներ են պետք, որը ավելի կերաշխավորի մեր հանրապետության անվտանգությունը»։

Հարցին, թե բանակը կընդդիմանա՞ տարածքների հանձնմանը, Մովսես Հակոբյանը պատասխանեց. «Բանակը կատարելու է այն, ինչ որոշի քաղաքական իշխանությունը»։

Պատասխանելով հարցին, թե ՌԴ կողմից Ադրբեջանին զենք վաճառելը Հայաստանի անկախությանը վտանգ չի սպառնո՞ւմ, Մ. Հակոբյանն ասաց. «Ցանկացած սպառազինություն, որը ձեռք է բերում Ադրբեջանը, սպառնալիք է Հայաստանի և Արցախի համար»։

Նա նաև նշեց, որ Հայաստանն այնքան սպառազինություն է ձեռք բերում, որը ապահովում է երկրի անվտանգությունը: