Ձեր վստահելի աղբյուրը

«Այսօրվա ասուլիսն ուզում ես սկսել հանրապետության նախագահին դիմելով՝ Արմավիրի մարզպետը մեր երկրի թագավորներից մեկն է, ով ոչ վարչապետ, ոչ նախարար, փոխվարչապետ, կարծես ոչ մեկին չի լսում»,- այսօր լրագրողների հետ հանդիպմանն ասաց «Ելք» դաշինքից ավագանու անդամ Անահիտ Բախշյանը՝ ներկայացնելով Արմավիրի մարզի Արտաշար գյուղի դպրոցի տնօրեն նշանակման հետ կապված որոշումը:

Նա մանրամասնեց, որ այս դպրոցի տնօրենի նշանակման հետ կապված պատմությունը սկսվում է նախորդ տարվա նոյեմբերից. «Դպրոցի տնօրենի հավաստագրման հնգամյա ժամկետն ավարտելուց հետո տնօրենի նոր ընտրություն պիտի լիներ: Այդ ընտրությունը նոյեմբերից այսօր այդպես էլ չկայացավ և ակնհայտ էր մարզպետի ճնշող ձեռքն այդ գործընթացի վրա: Տնօրենի պաշտոնի հավակնորդներն էին  դպրոցի նախկին տնօրեն, լեզվի ու գրականության ուսուցչուհին և Մեծամոր քաղաքից եկած ֆիզկուլտուրայի ուսուցիչը: Կարող եմ ենթադրել, որ ընտրության որոշման վրա ազդեցություն է ունեցել կաշառքը: Մարզպետն այնպես արեց, որ մրցույթը չկայանա, մինչ այս տարվա սեպտեմբերի 4-ը, որից մի քանի անգամ բարձրաձայնելուց հետո ես ստանում եմ Կրթության և գիտության նախարարության աշխատակազմի նամակն այն մասին, որ երկու հավակնորդների գործերն ուղարկվել է փոխվարչապետին: Ուզում եմ հարցս տալ փոխվարչապետ Վաչե Գաբրիելյանին, ինչ չափորոշիչներով նայեց հավակնորդներին, որ հինգ աշխատանքային օրվա փոխարեն  11 աշխատանքային օր հետո որպես  դպրոցի տնօրենի թեկնածու ներկայացրեց ֆիզկուլտուրային ուսուցչին՝ այսինքն մարզպետի մարդուն»:

Բախշյանը համոզված է, որ այս ամբողջ ընթացքում արմավիրի մարզպետն ամեն ինչ արել է, որ իր ուզած մարդուն նշանակի Արտաշարի դպրոցի տնօրեն:

«Իրավունք ունեմ երթադրելու, որ այստեղ կա շահախնդրություն, քանի որ մյուս թեկնածուին նույնպես ակնարկել էին, իսկ նա հրաժարվել էր: Ի վերջո հաղթեց փողը, ոչ թե դպրոցը, կրթությունը»,- ասաց ավագանու անդամը՝ նշելով, որ գյուղի ժողովուրդը ևս վրդովված է այս փաստով:

Նրա խոսքով՝ ոչ մի երկրում չկա նման բան, որ աշխատանքային պայմանգիրը դպրոցի ընտրված տնօրենը կնքում է մարզպետի հետ:

«2016 թվականի վերջում բերեցին մտցրեցին այս կետը, որ փոխվարչապետը պիտի վերջում որոշում կայացնի այս հարցում, ի՞նչ կապ ունի այստեղ փոխվարչապետը: Առանց նսեմացնելու եմ ասում՝ ի՞նչ կապ ունի այստեղ եկած ֆիզկուլտուրայի ուսուցիչը, այն դեպքում գյուղում ընդունում են լեզվի և գրականության ուսուցչին: Ես գիտեմ, որ գյուղում նեղսրտած են և անգամ մտադիր են երեխաներին ուրիշ դպրոց  ուղարկել: Հետո էլ կգնան օպտիմալացման, կասեն դպրոցում երեխա չկա: Պարոն վարչապետ, կոռուպցիայի դեմ պայքարից եք խոսում, իսկ Արմավիրի մարզպետը ձեր որոշումների վրա խաչ քաշած ունի: Ես ուզում եմ Արմավիրի մարզպետի աթոռը դատարկ տեսնել»,- ամփոփեց Անահիտ Բախշյանը: