Ձեր վստահելի աղբյուրը

ԵԱՀԿ Խորհրդարանական վեհաժողովի՝  Հարավային Կովկասի հարցերով հատուկ ներկայացուցիչ, Քրիստիան Վիգենինն ավարտել է Ադրբեջան կատարած երկօրյա այցը՝ կոչ անելով հատուկ ուշադրության կենտրոնում պահել Լեռնային Ղարաբաղի հակամարտության՝ տարածաշրջանում ապրող մարդկանց վրա ունեցած ազդեցությունը:

Վեհաժողովի մամուլի ծառայության հաղորդմամբ, հատուկ ներկայացուցիչը Բաքվում հանդիպել է ԱԺ նախագահի, պաշտպանության նախարարի , ԵԱՀԿ ԽՎ խորհրդարանական պատվիրակության անդամների հետ: Երկուշաբթի նա եղել է Մասազիր շրջանում հանդիպելու տեղի մարդկանց հետ:
«Մենք երբեք չպետք է մոռանանք, որ Լեռնային Ղարաբաղի հակամարտությունը շարունակում է զոհերի պատճառ դառնալ:  Ստատուս քվոն պարզապես անընդունելի է: Ես մտադիր եմ շարունակել աշխատանքս, որպեսզի  այս ողբերգական իրողությունը քաղաքական առաջնորդների օրակարգի բարձր տեղերում պահենք:  Մենք չենք կարող թույլ տալ, որ խուսափենք կյանքեր փրկելուց», - ասել է Վիգենինը:

Հիշեցնենք, որ հատուկ ներկայացուցիչն Ադրբեջանում էր  Հարավային Կովկասում կատարած  մեկ շաբաթյա այցի շրջանակում: Նա կլինի նաև Վրաստանում ու Հայաստանում:

ԵԱՀԿ ԽՎ հատուկ ներկայացուցիչը վերահաստատել է, որ հակամարտությունը ռազմական լուծում չունի, նա իր աջակցությունն է հայտնել խնդրի կարգավորմամբ զբաղվող ԵԱՀԿ Մինսկի խմբի համանախագահների ջանքերին:  Նա կոչ է արել բոլոր կողմերին դադարեցնել ագրեսիվ հռետորաբանությունը և առավել կառուցողական ջանքեր գործադրել խաղաղության հասնելու համար՝ այդ գործում կարևորելով քաղաքական կամքի առկայությունը:

Նա ողջունել է առաջիկայում Հայաստանի և  Ադրբեջանի նախագահների նախատեսված հանդիպումը,  ընդգծել է, որ հակամարտության  լուծման վերջնական պատասխանատվությունը երկու երկրների կառավարություններինն է, իսկ միջազգային հանրության առավել մեծ ուշադրությունը կարող է աջակցել խաղաղության հասնելու ջանքերին: Նա նշել է հակամարտության կարգավորման գործում խորհրդարանական կառուցողական  երկխոսության կարևորությունը:

Վիգենին տարածաշրջանային այցի վերաբերյալ  ԵԱՀԿ ԽՎ կոմիտեում զեկույց կներկայացնի հոկտեմբերի 4-ին: