Ձեր վստահելի աղբյուրը

Հայաստանում վերջին 10 տարիների ընթացքում սեռով պայմանավորված աբորտների հետևանքով մայրական մահվան դեպքեր չեն գրանցվել: Հայ կանայք այնքան խելամիտ են, որ հակաբեղմանվորիչներ կիրառելու հետևանքով խուսափում են անցանկալի հղիություններից: Հակառակ պարագայում աբորտների համար դիմում են մասնագիտացված բուժհաստատություններ: Լրագրողների հետ այսօր կայացած հանդիպման ժամանակ այս մասին ասաց ՀՀ առողջապահության նախարարության մայրական և վերարտադրողական առողջության պահպանման բաժնի պետ Գայանե Ավագյանը` հիշեցնելով, որ աբորտը հղիության ընդհատումն է մինչև 22 շաբաթական ժամկետը:

Անդրադառնալով հղիության ինքնաբեր վիժումներին՝ մանկաբարձ-գինեկոլոգը նկատեց, որ շնորհիվ հսկողության և նոր մեթոդների ներդրման՝ այսօր դրանց թիվը տատանվում է 2500-2800-ի շրջանակներում:

«2016-ին գրանցվել է 2235 ինքնաբեր վիժում: Մեծացել է բժշկական ցուցումներով կատարվող արհեստական ընդհատումների թիվը: Եթե տասը տարի առաջ դրանց թիվը տարեկան կազմում էր 300-400 դեպք, ապա վերջին տարիներին այդ թիվը հասել է 1500-1700-ի: Սա նշանակում է, որ հղիների շրջանում սկրինինգային հետազոտություններ իրականացնելով՝ կարողանում ենք վաղաժամկետ հայտնաբերել պտղի զարգացման արատները»,- ասաց բժիշկը:

Գայանե Ավագյանը խիստ կարևորեց աբորտի պատրաստվող կնոջը սպասման շրջան տրամադրելու հանգամանքը, երբ սահմանված 3 օրերի ընթացքում ապագա մայրը ժամանակ է ունենում կրկին մտածելու, ընտանիքի հետ քննարկելու այդքան կարևոր հարցը: Հենց այդ սպասման շրջանից հետո շատ կանայք հետ են կանգնում աբորտի մտքից:

Բանախոսը նաև հիշեցրեց, որ սեռով պայմանավորված աբորտ կատարած բուժաշխատողը ՀՀ օրենսդրության համաձայն կարող է ենթարկվել աշխատավարձի 80-100-ապատիկի չափով տուգանքի: Ինչ վերաբերում է հղիությունն ինքնուրույն ընդհատելու փորձեր կատարող կանանց, ապա նրանց գործողությունները սահմանափակելու նպատակով դեղատներում վառճառվող դեղորայքը, կրկին օրենսդրորեն, վաճառվում է միայն բժշկի նշանակման թերթիկը ներկայացնելիս:

«Ընդհանուր առմամբ, վերջին տարիներին առկա է աբորտների նվազման միտում: Եթե 2000 թվականին մեկ կնոջը բաժին հասնող աբորտային գումարային գործակիցը կազմել է 2.6, ապա 2005-ին այդ ցուցանիշը իջել է 1.8-ի, 2010-ին՝  0.8-ի, իսկ ահա 2015-ին՝ 0.6-ի: Հատկանշական է, որ աբորտների և ծննդաբերությունների թիվը բավական նվազել է  նաև դեռահասների շրջանում»,- տեղեկացրեց ոլորտի ներկայացուցիչը:

Գայանե Ավագյանը ուշադրություն հրավիրեց այն հանգամանքի վրա, որ հղիության արհեստական ընդհատման հետևանքով առաջացած բարդություններից աշխարհում տարեկան մահանում է շուրջ 70-80 հազար կին:

Ինչ վերաբերում է մարզային վիճակագրությանը, ապա սեռով պայմանավորված ամենամեծ թվով աբորտները, Երևանից հետո, գրանցվում են Գեղարքունիքի, Արագածոտնի և Արարատի մարզերում, այն դեպքում, երբ Սյունիքի, Տավուշի, Լոռու մարզերում սեռով պայմանավորված աբորտները համեմատաբար փոքր թիվ են կազմում:

Ամփոփելով՝ Գայանե Ավագյանը հիշեցրեց, որ սեռային նորմալ համամասնությունը ենթադրում է 100 աղջկա դիմաց 105 տղայի ծնունդ, այն դեպքում, երբ Հայաստանում 100 աղջկա դիմաց ծնվում է 115 տղա: