Ադրբեջանի սև ցուցակը եվրոպացի քաղաքական գործիչներին չի խանգարի մեկնել Արցախ
Այսօր Երևանում մեկնարկել է և առաջիկա 3 օրերի ընթացքում Արցախում կշարունակվի ընկերվար երիտասարդների միջազգային միության անդամ կազմակերպությունների ներկայացուցիչների ճանչողական այցը Արցախ: Այսօր կայացած մամուլի ասուլիսի ժամանակ այս մասին ասաց ՀՅԴ Նիկոլ Աղբալյան ուսանողական միության վարչության ներկայացուցիչ Գևորգ Ղուկասյանը։
«Ընկերվար երիտասարդների միջազգային միությունը մոլորակի երիտասարդական քաղաքական խոշորագույն կազմակերպությունն է, որը ներառում է տարբեր երկրների սոցիալիստական, սոցիալ-դեմոկրատական կուսակցությունների երիտասարդական կազմակերպությունների: Այսօր Երևանում են մեկտեղվել պատվիրակություններ Եվրոպայից, Ամերիկայից, Մերձավոր Արևելքից, Նոր Զելանդիայից: Սա հնարավորություն է տալիս վաղվա հավանական առաջնորդներին հաղորդակից դարձնել ղարաբաղյան հիմնախնդրին և հարցի քննարկման համար քաղաքական առավել բարենպաստ դաշտ ստեղծել»,- ընդգծեց բանախոսը:
Գևորգ Ղուկասյանը տեղեկացրեց, որ երիտասարդ պատվիրակներն այսօր արդեն իսկ հանդիպել են ՀՅԴ Հայ դատի և քաղաքական հարցերի գրասենյակի ղեկավար Կիրո Մանոյանի հետ, ավելի ուշ նրանց կհյուրընկալի ՀՀ փոխարտգործնախարար Շավարշ Քոչարյանը:
Իսկ ահա Արցախում պատվիրակները կհանդիպեն քաղաքական մի շարք գործիչների, Մարդու իրավունքների պաշտպանի, ինչպես նաև «Թումո» ստեղծարար տեխնոլոգիաների կենտրոնի ներկայացուցիչների հետ: Նախատեսված են այցելություններ դեպի պատմական հուշարձաններ:
Ասուլիսին ներկա Իտալիայի Սոցիալիստական կուսակցության վարչության անդամ Ռոզելլա Պերան նշեց, որ առաջին անգամ է Հայաստանում: Ասաց, որ անչափ կարևորում է արցախյան հիմնախնդրի էությունը ըմբռնելը և իր տեղեկությունները եվրոպական մյուս երկրների երիտասարդներին փոխանցելը: Իտալացի քաղաքական գործիչն ափսոսանք հայտնեց, որ Եվրոպայում ղարաբաղյան հիմնախնդրի և անգամ Արցախի գոյության մասին շատերը չգիտեն:
Բուլղարիայի սոցիալ-դեմոկրատական երիտասարդական կուսակցության ատենապետ Դիմիտր Միտևն էլ երկրորդ անգամ է Հայաստանում: Վերջինս ևս անդրադարձավ արցախյան թեմային՝ նշելով, որ համադրելով հակամարտության մասին բոլոր փաստերը՝ ինքը հասկացել է՝ Արցախն ազատ և անկախ պետություն է, որն իր գոյության ողջ ընթացքում եղել է հայաբնակ:
«Կոսովոն արդեն 17 տարի է՝ անկախ պետություն է, իսկ Արցախը, որի պատմական տվյալներն ավելի հարուստ են, քան Կոսովոյինը, ցավոք մնում է չճանաչված: Միջազգային հանրության ճնշումների ներքո Արցախն ի վերջո կճանաչվի»,- համոզմունք հայտնեց երիտասարդ քաղաքական գործիչը:
Լրագրողներն օտարերկրացի հյուրերից հետաքրքրվեցին՝ տեղյակ են արդյոք, որ Արցախ այցելելով՝ հնարավոր է՝ հայտնվեն Ադրբեջանի սև ցուցակում: Պարզվեց՝ երկու բանախոսներն էլ այդ մասին գիտեն:
«Մենք տեսնում ենք՝ ովքեր են ագրեսորները և ովքեր՝ ագրեսիայից տուժողները: Մենք աջակցում ենք մեր հայ ընկերներին: Էական չէ, որ Ադրբեջանի նման ագրեսիվ պետության կողմից կհայտնվենք սև ցուցակում: Ավելի էական է, որ Արցախում մարդիկ շարունակեն ապրել ապահով կյանքով»,- ասաց Դիմիտր Միտևը:
Իտալուհին էլ նշեց, որ Ադրբեջանի սև ցուցակում հայտնվելու հեռանակարը չի վախեցնում իրեն:
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
