Ձեր վստահելի աղբյուրը

Հինգ տարի անազատության մեջ անցկացրած Սոցիալական ապահովության պետական ծառայության նախկին պետ Վազգեն Խաչիկյանը «Ազատություն» ՌԿ-ի հետ զրույցում նշեց, որ շատ բաների համար է զղջում: Չմանրամասնեց, միայն ասաց. «Միայն Աստված գիտի ու ես գիտեմ: Զղջումը շատ ներքին զգացում է, որ չէի ուզենա բարձրաձայնել, հրապարակավ արտահայտվել, շատ բան կա, որի համար զղջում եմ»:

Լրագրողի դիտարկմանը, թե դատավարության ողջ ընթացքում պետական պաշտոնյան չընդունեց իր մեղքը, այսօր իրեն մեղավոր համարո՞ւմ է,  նա արձագանեց.

«Այսպես ասեմ, կա քրեադատավարություն և Աստծո դատաստան, ես մեղավոր եմ Աստծո առաջ»:
Դատավարությունն ու ազատազրկումը Խաչիկյանը համարում է իր կյանքի փակված էջը, որը չի ցանկանում բացել:

Ինչ վերաբերում է հարցին՝ արդյոք նրանից հօգուտ պետության բռնագանձվել է դատարանի սահմանած գումարը, Խաչիկյանն ասաց. «Ես այլ հարցերի հիմա չեմ պատասխանի: No comment, անգլերեն ասե՞մ»:

Նա հայտարարեց, որ չի ցանկանում փոխել հայրենիքը, ասաց՝ մինչև կյանքի վերջ կմնա Հանրապետական, որովհետև, ըստ նրա, դա ավելի շուտ գաղափարախոսություն է, դա իր անցած ուղին է, իր ընկերներն են:

Պաշտոն ստանձնելու ցանկության մասին հարցին էլ պատասխանեց.
«Իմ պաշտոնս ՀՀ շարքային քաղաքացին է, ամենաբարձր պաշտոնը: Չեմ կարծում, որ մարդու կյանքը սկսում և վերջանում է պաշտոնով: Ես այն ժամանակ, երբ պաշտոն ունեի, ավելի թույլ էի»: