Ձեր վստահելի աղբյուրը

Արմավիրի մարզի Ակնալիճ գյուղում երեք օր շարունակ Հայաստանում եզդիական համայնքի ներկայացուցիչներն ազգային երգ ու պարով տոնում են սրբատեղիի օծման հինգերորդ տարեդարձը:

Նախորդ տարիներն էլ համայնքում տոնական տրամադրություն է եղել: Այս տարի միջոցառումներն ավելի ընդգրկուն են, հյուրերը՝ ավելի շատ:

«Աշխարհի տարբեր երկրներից եզդիական համայնքների ներկայացուցիչներ են հրավիրված, տարբեր երկրների խորհրդարաններում ընդգրկված եզդի պատգամավորներ, քաղաքական ու մշակութային գործիչներ»,- Panorama.am-ի հետ զրույցում ասաց Հայաստանում եզդիական համայնքի ներկայացուցիչ Ռուստամ Բաքոյանը, ով նաև «Շամս» մարդասիրական ՀԿ-ի նախագահն է:

Ամեն տարի սեպտեմբերի 29-ին Ակնալիճում է նաև ԿԳ նախկին նախարար Սերգո Երիցյանը:

«Շուրջպարի հարթակից այն կողմ նոր կառուցվող տաճարն է: Այս տարվա ուղերձները շատ հետաքրքիր են՝ ազգային ինքնությունը, կառուցվող տաճար: Մեր կողքին ապրող եզդի ժողովուրդը կունենա իր տաճարը»,-ասաց նա:

Միջոցառմանը ներկա էին նաև ԱԺ փոխնախագահ Էդուարդ Շարմազանովը, պատգամավորներ Կնյազ Հասանովը,  Ռուստամ Մախմուդյանը:

«Շատ լավ հասկանում ենք ու գիտակցում ենք ազգային փոքրամասնությունների դերն ու նշանակությունը, դրանով պայմանավորված՝ մենք  հնարավորություն ենք տվել Հայաստանում ապրող  ազգային փոքրամասնություններին իրացնել իրենց բոլոր իրավունքները՝ կրոնական, կրթական, քաղաքական»,-լրագրողներին ասաց Էդուարդ Շարմազանովը: Հայաստան ժամանած եզդիներն ավելի վաղ հյուրընկալվել էին Ազգային ժողովում:
 

Մանրամասները՝ տեսանյութում: