Ձեր վստահելի աղբյուրը

Հայաստանը սերտ կապեր ունի Եվրոպական միության հետ, մտադիր է ընդլայնել համապարփակ համագործակցությունը փոխադարձ հետաքրքրություն ներկայացնող բոլոր ոլորտներում: Երևանում Եվրոպական հանձնաժողովի հարևանության և ընդլայնման հարցերով հանձնակատար Յոհանես Հանի հետ համատեղ ասուլիսում հայտարարեց ՀՀ արտաքին գործերի նախարար Էդվարդ Նալբանդյանը:

«Եվրոպական միությունը արժեքավոր աջակցություն է ցուցաբերում մեր երկրում ընթացող բարեփոխումներին, սատարում մարդու իրավունքների պաշտպանության և օրենքի գերակայության շարունակական խթանման, ժողովրդավարական ինստիտուտների և հաստատությունների առավել ամրապնդման, դատական համակարգի ու արդյունավետ կառավարման բարելավման ուղղությամբ Հայաստանի կողմից իրականացվող ջանքերին», - նշեց նախարարը:

Է. Նալբանդյանը նախ հիշեցրեց, որ ավարտվել և նախաստորագրվել է ՀՀ-ԵՄ Համապարփակ  և ընդլյանված գործընկերության համաձայնագիրը, ապա հավելեց, որ դրա  ստորագրումը նոյեմբերին Բրյուսելում կայանալիք Եվրամիություն-Արևելյան գործընկերության գագաթաժողովի հիմնական ձեռքբերումներից մեկը կարող է հանդիսանալ:

Նա նշեց, որ բրյուսելյան գագաթաժողովի նախապատրաստական աշխատանքները կարևոր տեղ էին զբաղեցնում հանձնակատար Հանի հետ  իրենց քննարկումներում, մտքեր են փոխանակել գագաթաժողովի եզրափակիչ հռչակագրի վերաբերյալ:

Նախարարի խոսքով, ՀՀ-ԵՄ օրակարգում կարևոր տեղ է  զբաղեցնում մարդկանց  միջև շփումների խրախուսումը. «Վիզային ռեժիմի ազատականացումը  հանդիսանում է շարժունակության և մարդկանց միջև շփումների խորացման կարևոր բաղադրիչներից մեկը,  ինչն ամրագրված է Վիլնյուսի և Ռիգայի գագաթաժողովների  հռչակագրերում»:

Նա նշեց, որ օրակարգը համալրվում է նոր բովանդակությամբ, մասնավորապես Տրանսեվրոպական տրանսպորտային ցանցի ընդլայնման, առաջարկներ կան ԵՄ և Արևելյան գործընկերության երկրներում  ռոումինգի սակագների հարմոնիզացիայի նվազեցման,  գործընկեր երկրներում տեղական արժույթով փոքր և միջին ձեռնարկություների զարգացման ֆինանսավորման վերաբերյալ:

«Համոզված եմ, որ մեր փոխգործակցությունը կհամալրվի նաև այլ փոխշահավետ ծրագրերով»,- նշեց Է. Նալբանդյանը: