Ձեր վստահելի աղբյուրը

«Այս տարվա կարևորագույն ուղղություններից էր ռազմադիվանագիտական  կապերի ակտիվացումը:  Ինտենսիվ տարի է եղել»,- լրագրողների հետ հանդիպմանն ասաց ՀՀ պաշտպանության նախարար Վիգեն Սարգսյանը՝ ամփոփելով պաշտոնավարման մեկ տարին:

Նա նշեց, որ տարվա ընթացքում կատարել է պաշտոնական այց ՌԴ, որը պաշտպանության նախարարության գծով վերջին տարիների ընթացքում առաջին այցելությունն էր, պաշտոնական այցերով եղել է Վրաստանում, Իրանում, որտեղ շատ կարևոր խնդիրներ ունեն լուծելու կապված ԶՈՒ մատակարարման, տարանցման, փոխգործակցության հետ, ունեցել է պաշտոնական այցեր Հունաստան, Կիպրոս, Չինաստան:

Նախարարի խոսքով, այցերի ընթացքում ստորագրվել են մի շարք առանցքային պայմանագրեր, երկկողմ փոխգործակցության ծրագրեր, որոնք Հայաստանի ռազմադիվանագիտական կապերի  պարբերականությունն ապահովող կարևորագույն գործիքներից են:

Պատասխանելով  կոնկրետ Չինաստան կատարած այցի արդյունքների մասին հարցին, մասնավորապես այդ երկրից զենքի գնման, նա նշեց.  «Մենք Չինաստանում չենք պայմանավորվել զենք-զինամթերք մատակարարելու մասին, բայց ունեցել ենք շատ կարևոր հանդիպումներ և քննարկումներ ռազմաքաղաքական երկխոսության և փոխգործակցության ծրագրերի մասին: Հայաստանի Զինված ուժերը երկար տարիներ  ունեն նաև Չինաստանից ներկրված որոշ զինատեսակներ, որոնք ցուցադրվել են մեր զորահանդեսների ժամանակ: Բազմիցս ասել եմ` մենք բաց ենք ցանկացած երկխոսության համար»:

Վ. Սարգսյանը նաև ասաց. «Ես նախընտրում եմ զենքը ցույց տալ զորահանդեսների ժամանակ: Դրա առաջիկա գնման, հնարավոր գնման, այստեղից կամ այնտեղից ձեռք բերելու մասին խոսակցություններն անօգուտ են, անիմաստ, առաջին հերթին, որովհետև դա դժվարացնում է բոլոր նման գործընթացները, երկրորդ՝ դա քո հեռանկարային ծրագրի բացահայտումն է, որը նաև հակառակորդին թույլ է տալիս հակամիջոցներ ձեռնարկել»: