Ձեր վստահելի աղբյուրը

«Պաշտպանության նախարարության վարչական ապարատի կառուցվածքի վերանայման ուղղությամբ մեծ նախապատրաստական աշխատանք է կատարվել, գերկարևոր խնդիր է կառավարման արդյունավետության բարձրացումը»,- լրագրողների հետ հանդիպմանն ասաց ՀՀ պաշտպանության նախարար Վիգեն Սարգսյանը՝ ամփոփելով պաշտոնավարման մեկ տարին:

Նա նշեց, որ կայացվելու են որոշումներ, որոնցով փորձելու են կրճատել բարձրաստիճան պաշտոնյաների թիվը՝ ավելի կենտրոնանալով անմիջական աշխատանք իրականացնող մասնագետների արդյունավետության բարձրացման վրա:

Նախարարը նաև նշեց, որ գնումների գործընթացը շարունակում են բարելավել. «Այս տարվա 9 ամիսներին գնումների անվանացանկն առանց զգալիորեն փոփոխելու, առանց ապրանքատեսակների քանակների վերանայման, ունեցել ենք միջինում 10 տոկոսի խնայողություն նախորդ տարվա գնումների նկատմամբ: Զգալի, բավականին  լուրջ թիվ է: Այդ թիվն ամբողջությամբ վերաբաշխվելու, օգտագործվելու է սպառազինության, զենքի ձեռքբերման խնդիրները  լուծելու ուղղությամբ»:

Վ. Սարգսյանն ասաց, որ շարունակելու են այդ աշխատանքը, սկզբունքները հստակ են և պարզ. «Բանակին  մատակարարող գործարարը պետք է վստահ լինի, որ ինքը  արդար և հավասար դաշտում է գործում, մենք պետք է վստահ լինենք, որ իր մատակարարած ապրանքը լիարժեքորեն համապատասխանում է հայտարարագրված չափորոշիչներին: Այն փաստաթղթերը, որոնք ներկայացնում են մատակարարվող ապրանքի հետ, պետք է լինեն գերճշգրիտ, այսինքն որևէ կեղծիք այդտեղ չի ներվելու, հետևողական ենք լինելու այդ հարցում: Մեզ մատակարարվող ապրանքը պետք է լինի շուկայականից  ցածր գնով, որովհետև մենք մեծ գնորդ ենք և ունենք այդ իրավունքը: Մենք միաժամանակ պետք է վստահ լինենք, որ որակ-գին հարաբերակցության մեջ մեր Զինված ուժերը, զինվորը չի տուժում, ստանում է որակյալ, լավ ապրանք և ժամանակին»:

Պաշտպանության նախարարի խոսքով, այս տարվա ընթացքում կտրուկ նվազեցրել են  բանակին թերմատակարարումների արատավոր երևույթը, երբ ընկերությունը շահելով մրցույթը, ամիսներ շարունակ  ուշացնում էր ապրանքի մատակարարումը:

«Ունենք որոշ դեպքեր, երբ այդ ուշացումները լինում են  օբյեկտիվ, երբեմն սուբյեկտիվ պատճառով: Օբյեկտիվ պատճառների դեպքում փորձում ենք ընդառաջել՝ հասկանալով, որ կարող է լինել ճանապարհի խնդիր, սուբյեկտիվ դեպքերում միանշանակ գնում ենք այդ դեպքերի հետևից, խզում ենք պայմանագրերը, որոնք ծանր հետևանքներ են ունենում մատակարարի համար թե տույժ, տուգանքների, թե հետագայում  պետական գնումներին մասնակցության տեսակետից: Շարունակելու ենք այս քաղաքականությունը, հասնելու ենք նրան, որ բանակի հետ պայմանագիր կնքող գործարարը զգալու է և պատասախանատվություն, և պատիվ Զինված ուժերի մատակարար լինելու այդ կարևոր կարգավիճակին»,- նշեց Վ. Սարգսյանը:

Նա նաև ասաց, որ գրեթե զրոյի են հասցրել կանխավճարները բոլոր այն ոլորտներում, որտեղ կանխավճարը հիմնավոր չէ, որոշ բացառություններով՝ զենքի զինամթերքի վերանորոգման, որոշ տեսակի սպառազինությունների մատակարարման, երբ կանխավճարը պարտադիր պայման է:

«Հասնելու ենք նրան, որ կանխավճարների դաշտը  բոլորի համար լինելու է հստակ, եթե որևէ ապրանքատեսակ նախատեսում է կանխավճար, ապա այդ կանխավճարը ներառված է լինելու գնման հայտարարության մեջ,  ոչ թե տրվելու է հաղթած ընկերությանը զարթուղի ճանապարհով: Կարևոր սկզբունք է թափանցիկության ապահովման տեսակետից»,- նշեց նախարար Վ. Սարգսյանը:

Պատասխանելով վերջին օրերին Զինված ուժերում նոր նշանակումների, փոփոխությունների  մասին հարցին, նախարարն ասաց, որ զինվորական ծառայության մեջ չափազանց կարևոր է ռոտացիոն մոտեցումը, որպեսզի նաև բարձրագույն սպայական  պաշտոններ զբաղեցնող անձիք պարբերաբար փոխեն իրենց աշխատանքի ուղղությունը, ոլորտը, ինչը թույլ է տալիս ձևավորել կարող ուժեր ԶՈՒ խնդիրները լուծելու համար: 

«Իրոք, այս օրերին մի շարք փոփոխություններ տեղի ունեցել են ու առաջիկա օրերին ևս լինելու են նման փոփոխություններ։ Դրանք կրում են ռոտացիոն տեղաշարժի,  այսինքն մեր ներսում  աշխատանքի արդյունավետության հետագա բարձրացման խնդիր, որևէ այլ բան դրա մեջ ման գալ, իրոք, պետք չէ: Բնական գործընթաց է ցանկացած ծառայության մեջ», - ասաց Վիգեն Սարգսյանը: