Ձեր վստահելի աղբյուրը

«Մենք ունենք ռազմարդյունաբերական համալիր զարգացման շատ հավակնոտ ծրագիր»,- լրագրողների հետ հանդիպմանն ասաց ՀՀ պաշտպանության նախարար Վիգեն Սարգսյանը:

Նա նշեց, որ օրեր առաջ կայացել է ռազմարդյունաբերական համալիրի զարգացման խորհրդի նիստ ՀՀ վարչապետի նախագահությամբ, առաջիկա օրերին, ինչպես խոսք էր տվել պատգամավոր Նիկոլ Փաշինյանին, ունենալու են նման ներկայացում պատգամավորների համար, ովքեր հետաքրքրություն կունենան: 

«Այդ ծրագիրը որոշակի ֆինանսավորման կարիք ունի, որպեսզի կարողանանք ավելի շատ աշխատանք կատարել: Այն ուղղությունները, որոնցով այսօր մեր հետազոտական թիմերն աշխատում են, իրոք, առաջնային են, մեծ կարևորություն ունեն Զինված ուժերի համար: Վստահ եմ, որ գործնական իրագործում են ունենալու առաջիկա մեկ-երկու տարվա ընթացքում, որովհետև  ունենք դրա նախադեպերը: Իրոք, ունենք բաներ, որոնցով կարող ենք հպարտանալ, վստահ եմ, որ առաջիկայում դրանք շատանալու են»,- ասաց Վ. Սարգսյանը:

Նախարարն ընդգծեց, որ կան բաներ, որոնք այնքան առաջադեմ են, նորարարական, որ մեծ հետաքրքրություն են առաջացնելու միջազգային շուկաներում: