Ձեր վստահելի աղբյուրը

Սահմանապահ Ոսկեպար եկող-գնացողներին առաջինը դիմավորում են գյուղի ծերերը, որոնք արևի տակ տաքացնում են ոսկորներն ու անցած-գնացած օրերից պատմում: Նրանց զրույցը սկսվում է սահմանային իրավիճակից,  Ռուսաստան մեկնած երեխաներից  ու թոռներից, գյուղի անցուդարձից:

Մեր՝ «ոնց եք» հարցին, միանգամից մի քանի հոգով ասում են՝ սահմանին խաղաղ լինի, մնացածը կլինի:

Այս տարվա ամառային զորակոչին Panorama.am-ն այցելել էր զինվորական հավաքակայան, որտեղ զրուցել էր ոսկեպարցի եղբայրներ Ռաֆիկ և Արմեն Բեգլարյանների հետ: Վիճակահանությամբ որոշվել էր՝ նրանք ծառայելու են Արցախում: Հորեղբոր տղաներին չէր անհանգստացնում այն փաստը, որ հնարավոր է առաջնագծում ծառայեն։

«Մենք լավ գիտենք, թե սահման պահելն ինչ բան է: Պատրաստ գնում ենք, մենք կրակոցից վախեցող չենք»,- ասում էր Ռաֆիկը, իսկ Արմենն էլ հավելում էր.  «Գյուղի տղերք ենք, հեշտ կհարմարվենք ծառայությանը, հետո մենք սովոր ենք, ամբողջ կյանքներս անցել է կրակոցների մեջ: Հակառակը, որ չեն կրակում, մի տեսակ անսովոր է լինում»:

Ոսկեպարում փորձում ենք գտնել տղաների տները: Համայնքի ղեկավարն այդ մասին իմանալով՝  մեզ անմիջապես ուղեկցում է Արմենենց տուն: Բեգլարյանների դարպասից դեռ ներս չմտած, լսում ենք բարձր խոսող կնոջ ձայնը. «Քեզ լավ նայի…»:  Արմենի հետ են խոսում, մայրն է, որն ամեն անգամ, ամեն օր չի դադարում նույն խոսքերը կրկնել՝ «հաց կերե՞լ ես», «տեղդ լա՞վ է», «Լավ մնա»:  

Ծնողներն ասում են, որ թե որդին, թե Ռաֆիկը գոհ են ծառայությունից: Հորեղբոր տղաները, ինչպես իրենք էին ցանկանում, ծառայում են նույն զորամասում:

«Ամեն օր զանգում է, որ մի օր զանգն ուշանում է, սկսում եմ անհանգստանալ»,- ժպտալով նշում է Արմենի մայրը՝ Էվզան:

Հայրն էլ՝ Գագիկ Բեգլարյանը, ավելացնում է՝  տղաների համար ծառայելն ավելի հեշտ կլինի, ծնված օրվանից  կրակոցների տակ են. «Սահմանապահ գյուղի մարդիկ լավ գիտեն խաղաղության գինը: Ոսկեպարի կռիվների ժամանակ մենք էինք սահմանին կանգնած,  այսօր մեր էրեխեքն են հայրենիքը պաշտպանում»: 

Երեք երեխաների հայր Գագիկ Բեգլարյանն աշխատում է էլցանցում: Չի բողոքում, միայն ասում է, որ բոլոր խնդիրներն էլ լուծելի են. «Մենակ էրեխեքը սաղ-սալամաթ գան մեզ հասնեն: Թող բոլոր զինվորներն անփորձանք, խաղաղ լինեն, առողջ վերադառնան տուն»:

Լուսանկարները՝ Լիլիան Գալստյանի: