Ձեր վստահելի աղբյուրը

Մեկնարկեց ՀՀ Ազգային Ժողովի հերթական քառօրյա նիստի աշխատանքը։ Նստաշրջանի օրակարգի նախագծում ընդգրկված են 3 տասնյակից ավելի նախագծեր ու համաձայնագրեր։

Այս նստաշրջանի օրակարգում ընդգրկվել է նաև «Հայաստանի Հանրապետության մասով Եվրասիական Տնտեսական Միության պայմանագրի գործողությունը դադարեցնելու գործընթաց սկսելու վերաբերյալ» ՀՀ Ազգային ժողովի հայտարարության նախագծի վերաբերյալ Ազգային ժողով եզրակացություն ներկայացնելու համար ԱԺ ժամանակավոր հանձնաժողով ստեղծելու մասին» հարցը:

«Թեև գլխավոր հանձնաժողովը բացասական եզրակացություն է տվել նախագծին, բայց ԱԺ կանոնակարգ սահմանադրական օրենքի 96-րդ հոդվածի համաձայն «Ելք» խմբակցության որոշման հարցը համարվել է արտահերթ, և մենք ըստ վերոնշյալ հոդվածի այդ նախագիծը պետք է քննարկենք այսօր երկրորդ նիստում։ Այս հարցը որպես պարտադիր քննարկման հարց ընդգրկված է նաև հերթական նիստերի օրակարգի առաջին բաժնում։ Այս նախագիծը ընդգրկվում է վեցերորդ գումարման երկրորդ նստաշրջանի օրակարգ առանց քվերակության»,-ասաց ԱԺ նախագահ Արա Բաբլոյանը։

Նա նաև հայտնեց, որ երկրորդ բաժնի հարցերի թիվը որոշելիս հաշվի են առնվել կառավարության և մշտական հանձնաժողովների գրավոր առաջարկները, քննարկման հարցերի ծավալը, ինչպես նաև հարցերի քննարկման տևողությունը սահմանելու լրացուցիչ նիստեր անցկացնելու կամ հերթական նիստեր շարունակելու հնարավորությունը։

«Այս բաժնում 32 հարց է ընդգրկված»,-ասաց Բաբլոյանը։

82 կողմ, 5 դեմ ձայների քվերակությամբ օրակարգը հաստատվեց։