Ձեր վստահելի աղբյուրը

«Շատերը մեզ ասում են, եթե ձեր հայտարարության բովանդակության մեջ համոզված եք, ինչու եք ԱԺ եզրակացություն ներկայացնելու վերաբերյալ ժամանակավոր հանձնաժողով ստեղծելու առաջարկով հանդես գալիս։  Դա շատ պարզ պատճառ ունի, հիմա առավել ևս, քանի որ «Ելք» դաշինքը որպես բազմակարծությունը և քննարկման ոգին գնահատող ուժ՝ հակափաստարկների ակտիվ փնտրտուքների մեջ է»,- այս մասին այսօր խորհրդարանում  արտահերթ ռեժիմով ՀՀ-ն ԵԱՏՄ-ից դուրս բերելու առաջարկն ուսումնասիրելու համար ժամանակավոր հանձնաժողով ստեղծելու հարցի քննարկմանը ասաց հիմնական զեկուցող «Ելք» խմբակցության անդամ Նիկոլ Փաշինյանը։

Նրա խոսքով՝ այս հարցը իրենք քննարկել են ԱԺ գլխադասային հանձնաժողովում. «Այդ քննարկման ընթացքում մենք լուրջ հակափաստարկներ չենք լսել: Հենց այդ հակափաստարկները լսելու համար ենք մենք ժամանակավոր հանձնաժողով ստեղծելու առաջարկ արել։ Ժամանակավոր հանձնաժողովի նիստերը կարող են անցկացվել նաև դռնփակ ռեժիմով, և այնտեղ քաղաքական մեծամասնությունը ներկայացնող պատգամավորները, ովքեր չեն կարող ինչ-ինչ բաների մասին հրապարակային խոսել, կարող են դրանց մասին բարձրաձայնել դռնփակ նիստերի ընթացքում»։

Հիմնական զեկուցողը նշեց, որ ապրիլյան պատերազմի ժամանակ իշխանություններն ասում էին, որ ԵԱՏՄ-ն անվտանգությանը չի առնչվում, սա զուտ տնտեսական միավորում է. «Երբ հարցնում էինք՝ ԵԱՏՄ անդամ երկիրն ինչու՞ այնպիսի տնտեսություն ունի, որ ստիպված է պատերազմել 80-ական թվականների զենքով, մեզ պատասխանում էին՝ բաներ կան, որոնց մասին չի կարելի բարձրաձայն խոսել: Իսկ եթե չի կարելի, ապա եկեք հավաքվենք ժամանակավոր հանձնաժողովի ձևաչափով և այս հարցը քննարկենք, թեկուզ և փակ դռների ետևում»։

«Ելք» խմբակցության պատգամավոր Լենա Նազարյանը հարց ուղղեց, թե ի՞նչ կարծիք ունեն, այն տեսակետի վերաբերյալ, որ նոյեմբերից առաջ, երբ նախատեսվում է Եվրոպայի հետ համաձայնագիրը վերջապես ստորագրել, չարժե այս թեման բարձրաձայնել:

«Ինքս այդ պաուզայի սկզբունքը պահել եմ 2013 թվականին, երբ նախատեսվում էր Ասոցացման համաձայնագրի ստորագրումը, մտածել եմ, որ խորհրդարանում դրա արծարծումը կարող է խնդիր ունենալ, բայց դիվանագետների հետ հանդիպումներում կանխատեսել էի, որ չի ստորագրվի: Նաև քառօրյա պատերազմից առաջ էին ասում, որ չքննարկենք բանակի խնդիրները, որ թուրքը չլսի, չիմանա, բայց պատերազմը ցույց տվեց՝ դա սխալ մեթոդաբանություն է, բոլոր հարցերը պետք է քննարկվեն, բոլոր փաստարկները պետք է լսվեն և գոյություն ունեցող հակափաստարկները պետք է քննարկվեն»,-ասաց Փաշինյանը։

Հանրապետական խմբակցության պատգամավոր Խոսրով Հարությունյանն էլ հարցրեց, թե նրանց առաջարկը ենթադրո՞ւմ է արդյոք, որ «Ելք»-ը նախընտրում է այլ միավորի մեջ մտնելը, թե՞ ոչ։

Փաշինյանը պատասխանեց, որ իրենց նպատակը ՀՀ ինքնիշխանությունը պաշտպանելն է. «Մենք կարծում ենք, որ  ԵԱՏՄ անդամակցությունից հետո ՀՀ ինքնիշխանությունը ստացել է շատ լուրջ հարվածներ և բոլոր հիմքերը կան ենթադրելու, որ այդ պրոցեսները շարունակվելու են: Շատ կարևոր է աշխարհաքաղաքական հակակշռումներ ունենալ, և այդ առումով կարևորում ենք ԵՄ-ի հետ Ասոցացման համաձայնագրին և Խորը և համապարփակ ազատ առևտրի համաձայնագրին միանալը, որպես ՀՀ ինքնիշխանությունը պաշտպանող հակակշիռ»։

Հարակից զեկուցող, ՀՀ ԱԺ արտաքին հարաբերությունների հանձնաժողովի նախագահ Արմեն Աշոտյանն էլ  ասաց, որ ապրիլյան պատերազմի կորուստները կապել ԵԱՏՄ անդամակցության հետ, նույնքան ուժեղ փաստարկ է, որքան «Ելք»-ի՝ ԱԺ-ում հայտնվելը ԵԱՏՄ-ի հետ. «Որևէ կապ չունեցող գործընթացներ են, հասկանում եմ, որ գուցե հռետորաբանության մեջ ժամանակային առումով այս համադրումը փաստարկ է, բայց ես էլ, եթե ուզենամ, կարող եմ ասել, որ ԵԱՏՄ-ի շնորհիվ դուք մտաք խորհրդարան»։