Ձեր վստահելի աղբյուրը

ԱԺ-ում քննարկվում է «Հայաստանի Հանրապետության և Ռուսաստանի Դաշնության միջև՝ Հայաստանի Հանրապետության զինված ուժերի և Ռուսաստանի Դաշնության զինված ուժերի զորքերի (ուժերի) միացյալ խմբավորման մասին» համաձայնագիրը վավերացնելու մասին  օրենքի նախագիծը։

Հիմնական զեկուցող, պաշտպանության նախարարի առաջին տեղակալ Արտակ Զաքարյանը նշեց, որ նախագիծը բխում է սահմանադրական փոփոխություններից:

«Հարցը բազմիցս քննարկվել է ՌԴ պաշտպանության նախարարության պատվիրակությունների հետ պաշտոնական հանդիպումների ընթացքում, հանրագումարային արձանագրություններում փաստվել էր ՀՀ տարածքում, ՀՀ ԶՈՒ և ՌԴ ԶՈւ-երի արդեն 15 տարուց ավելի ՀՀ տարածքում գործող զորքերի միացյալ խմբավորման գործունեությունը համակարգող նորմատիվաիրավական բազայի կատարելագործման նկատառումով։ Անհրաժեշտ են նորմատիվաիրավական բազայի արդիական փաստաթղթեր, որոնցով կսահմանվեր ՀՀ տարածքում ՀՀ և ՌԴ ԶՈւ-երի կազմավորման և գործունեության, ինչպես նաև այն կիրառելու որոշում ընդունելու և իրականացնելու կարգը»,- ներկայացրեց հիմնական զեկուցողը։

Փոխնախարարը մանրամասնեց, որ համաձայն նախագծի՝ ռազմական դրություն հայտարարում է ՀՀ կառավարությունը` ՀՀ վրա զինված հարձակման, դրա անմիջական վտանգի առկայության կամ պատերազմ հայտարարվելու դեպքերում: Ռազմական դրություն հայտարարելու դեպքում կառավարությունն ուղերձով դիմում է ժողովրդին և կարող է հայտարարել ընդհանուր կամ մասնակի զորահավաք:

Նախագիծն ընդունվելու դեպքում՝ այն ուժի մեջ կմտնի 2018 թվականի ապրիլին։

Հիմնական զեկուցողին հարց ուղղեց ՀՅԴ պատգամավոր Աղվան Վարդանյանը, թե համաձայնագիրն որքանո՞վ է առնչվում ԼՂՀ սահմաններին:

«Համաձայնագրով նախատեսվում են միացյալ գործողություններ, որոշումների կայացում և զորքերի կիրառում ՀՀ տարածքի նկատմամբ ամբողջական սպառնալիքի և ագրեսիայի դեպքում և ՌԴ-ի տարածքի նկատմամբ ամբողջական սպառնալիքի և ագրեսիայի դեպքում։ Տվյալ պարագայում համաձայնագիր նախատեսում է ՀՀ տարածքի նկատմամբ ագրեսիայի կամ ռազմական գործողությունների կիրառման դեպքում»,-պատասխանեց նա:

Պաշտպանության փոխնախարարին հարց ուղղեց «Ելք» խմբակցության ղեկավար Նիկոլ Փաշինյանը. «Հայ հանրությանը մի հարց է մտահոգում, երբ Տավուշի մարզի սահմանամերձ գյուղերը գնդակոծվում են սիստեմատիկ, ՀԱՊԿ համակարգը ոչ մի ռեակցիա չի տալիս։ Ես ուզում եմ հարցնել, էս համակարգը, եթե, ասենք, լիներ 2015-2016 թվականների ժամանակ, ի՞նչ ռեակցիա էր տալու և, ընդհանրապես, ի՞նչ երաշխիք կա ու որտե՞ղ է այդ երաշխիքը, որ Թուրքիայի կողմից որևէ գործողության պարագայում ռեակցիա լինելու է»։

Փոխնախարարն ասաց, որ ՀԱՊԿ համակարգի մասով մի փոքր այլ տրամաբանություն է գործում, և յուրաքանչյուր անդամ-պետություն կարող է իր կոլեկտիվ անվտանգության համակարգից օգտվել որոշակի ընթացակարգերի պարագայում. «Մեր պարագայում այդ ընթացակարգերի կիրառման անհրաժեշտությունը չի եղել և մեր զինված ուժերն ինքնուրույն են կարողացել համապատասխան խնդիրը լուծել։ Ինչ վերաբերում է այս համաձայնագրին՝ այն խաղաղ ժամանակ պլանավորում է բոլոր հնարավոր զարգացումները, ռիսկերն ու վտանգները։ Այս համաձայնագրի պարագայում միայն հայ-թուրքական սահմանի հանգամանքը չի.  ՀՀ պետական սահմանի նկատմամբ ցանկացած տիպի ագրեսիայի և զինված հարձակման պարագայում համաձայնագիրը գործում է»։