Ձեր վստահելի աղբյուրը

«Լեհաստանի և Ղազախստանի հետ հանդիպումներին պետք է ամենաբարձր ձևով ներկայանանք և կարողանանք դրական արդյունքի հասնել երկու խաղերում էլ»,- լրագրողների հետ հանդիպմանն ասաց Հայաստանի ազգային հավաքականի ավագ Հենրիխ Մխիթարյանը:

Հիշեցնենք, որ հոկտեմբերի 5-ին  Վազգեն Սարգսյանի անվան «Հանրապետական» մարզադաշտում կկայանա Աշխարհի 2018 թ. առաջնության ընտրական փուլի Հայաստան-Լեհաստան հանդիպումը, իսկ հոկտեմբերի 8-ին՝ Աստանայի «Աստանա Արենա» մարզադաշտում՝ Աշխարհի 2018 թ. առաջնության ընտրական փուլի Ղազախստան-Հայաստան հանդիպումը:

Շարունակելով  իր խոսքը, Հ. Մխիթարյանն ասաց.  «Ճիշտ է՝ հնարավորություն չունենք դուրս գալ Աշխարհի առաջնություն, բայց դա ոչինչ չի նշանակում, խաղալու ենք մեր ազգի համար, թասիբի համար, ապացուցելու համար, որ որոշ մարդիկ սխալ են և կարող ենք լավ խաղալ ու հասնել արդյունքի»: 

Պատասխանելով հարցին, թե երկրպագուների մոտ հաճախ կարծիք կա, որ որպես ֆուտբոլիստ չեք կարողանում հավաքականում նույն օգտակարությունն ունենալ,  ինչ ձեր ակումբում, Հայաստանի ազգային հավաքականի ավագ, «Մանչեսթեր Յունայթեդի» կիսպաշտպան Հենրիխ Մխիթարյանն ասաց. «Ես տարբերություն չեմ դնում ազգային հավաքականում և թիմում խաղալու միջև: Երկու տեղում էլ ցանկանում եմ առավելագույնն անել: Ինչ-որ տեղ կարող է ստացվել, ինչ-որ տեղ՝ ոչ: Չի սխալվում այն մարդը, ով ոչինչ չի անում:

Եթե երկրպագուները դժգոհում են, դա իրենց կարծիքն է: Ես գիտեմ, թե ինչքանով եմ տրվում հավաքականի խաղերին, փորձում են հնարավոր ամեն ինչ անել, որպեսզի օգնեմ: Եթե «Մանչեսթեր Յունայթեդ»-ում հնարավոր է խաղն ավելի շատ ինքնս ինձ վրա վերցնեմ, հավաքականում ավելի շատ փորձում եմ իմ թիմակիցներին օգնել, որպեսզի թիմային խաղ ստացվի»: