Ձեր վստահելի աղբյուրը

«Այստեղ աղմուկ բարձրացնել, թե եկան վերահսկեցին, անկախություն, ինքնիշխանություն, ինչի մասին է խոսքը, մենք միջազգային իրավունքի սուբյեկտ ե՞նք, թե՞ վախեցած պետություն, որը փորձում է ոչ մեկի հետ ոչ մի հարցով հարաբերություն չունենա, որ հանկարծ իր դրոշակը մի փոքր չշեղվի»,- Ազգային ժողովում ասաց ՀՀ պաշտպանության նախարարի առաջին տեղակալ Արտակ Զաքարյանն՝ անդրադառնալով մինչ այդ հնչած ելույթներին։

Նրա խոսքով՝  Հայաստանը հնարավորություն կստանա միջև 2013 թվականի հունիսի 25-ի ՀՀ-ի և ՌԴ-ի միջև ռազմատեխնիկական համագործակցության զարգացման մասին պայմանագրի շրջանակներում մատակարարվող ռազմական նշանակության արտադրանքի առկայության և նպատակային օգտագործման նկատմամբ հսկողություն իրականացնելու:

«Վերջին շրջանում մենք սկսել ենք շատ ավելի լայն  ծավալի զինամթերք ձեռք բերել, այս անհրաժեշտությունն առաջացել է 2013թ. հունիսի 25-ին ստորագրված ռազմատեխնիկական համագործակցության զարգացման մասին պայմանագրով, որի 9-րդ կետով ասվում է, որ պետք է գործի երկկողմ համաձայնագիր, սա ոչ միայն Ռուսաստանի կողմից վերահսկողություն է Հայաստան մատակարարված զինամթերքի նկատմամբ, այլ երկկողմ է: Այս պայմանագրի շրջանակում պետք է նաև հսկողական խմբեր ձևավորվեն, և Հայաստանը հնարավորություն է ստանալու վերահսկել բոլոր զինատեսակների առկայությունը և նպատակային օգտագործումը, որը առաքվել է պայմանագրի կողմ հանդիսացող երկրին»,- մանրամասնեց փոխնախարարը։

Արտակ Զաքարյանը հավելեց՝ համաձայնագիրը միջազգային պրակտիկայից բխող գործընթաց է և առաջարկեց համապատասխան օրենքի ընդունմամբ վավերացնել այն։