Ձեր վստահելի աղբյուրը

ՀՀ ֆինանսների նախարարությունում տեղի է ունեցել ՀՀ ֆինանսների նախարարի հրամանով ստեղծված եկամուտների քաղաքականության կատարելագործման ընդլայնված հասարակական խորհրդի հերթական նիստը, որին մասնակցել են ֆինանսների նախարարության, այլ գերատեսչությունների և խորհրդակցական ձայնի իրավունքով խորհրդի կազմում ընդգրկված միջազգային հայտնի խորհրդատվական կազմակերպությունների ներկայացուցիչներ:

ՀՀ ֆինանսների նախարարության տեղեկատվության և հասարակայնության հետ կապերի բաժնի հաղորդմամբ, նիստի ընթացքում քննարկվել են ՀՀ հարկային օրենսգրքի ուժի մեջ մտնելու ժամկետը մեկ տարի հետաձգելու, գրավ դրված գույքի դատական և արտադատական կարգով բռնագանձման ընթացքում և լուծարման կամ սնանկացման ընթաց-քում առաջացող հարկային պարտավորությունների հաշվարկման ընթացակարգերի, անշարժ գույքի և փոխադրամիջոցների գույքահարկի հարկման համակարգի, եկամտային հարկի դրույքաչափերի վերանայման հետ կապված հարցեր:

Նիստի արդյունքում որոշվել է շարունակել գրավ դրված գույքի դատական և արտադատական կարգով բռնագանձման ընթացքում և լուծարման կամ սնանկացման ընթացքում առաջացող հարկային պարտավորությունների հաշվարկման ընթացակարգերի վերանայման աշխատանքները: Խորհրդի կողմից նպատակահարմար չի համարվել անշարժ գույքի և փոխադրամիջոցների գույքահարկի հարկման համակարգը, ինչպես նաև եկամտային հարկի դրույքաչափերը փոփոխելու առաջարկությունների ընդունումը: