Ձեր վստահելի աղբյուրը

«Այսօրվա խաղը թիմին հաստատ չի կարող օգուտ տալ, որովհետև մենք իրոք շատ վատ խաղացինք: Ավելի լավ կլիներ, որ մենք մարտավարական սխալներ թույլ տայինք և պարտվեինք, ու այդ դեպքում մեղադրեին մարզչին, քան մենք պարզ սխալների պատճառով նման հաշվով պարտվեինք Լեհաստանին: Այս խաղը հաստատ պետք է մոռանալ»,- Հայաստանի ֆուտբոլի ֆեդերացիայի հաղորդմամբ՝ նախօրեին Հայաստան-Լեհաստան հանդիպման ավարտից հետո կայացած ասուլիսում ասել է Հայաստանի ազգային հավաքականի գլխավոր մարզիչ Արթուր Պետրոսյանը: 

Հիշեցնենք, որ նախօրեին Երևանի Վազգեն Սարգսյանի անվան «Հանրապետական» մարզադաշտում Աշխարհի 2018 թ. առաջնության ընտրական փուլի Հայաստան-Լեհաստան հանդիպումն ավարտվել է 1:6 հաշվով՝ հօգուտ հյուրերի: 

Հարցին, թե այս իրավիճակից ելքը ո՞րն է, նա ասել է. «Այս պահին շատ դժվար է այդ հարցին պատասխանել: Ելքի համար մենք պետք է շատ ուժեղ ներքին առաջնություն ունենանք, մեր ֆուտբոլիստները խաղան եվրոպական ավելի բարձրակարգ ակումբներում: Ելքը դա է, որն այս պահին անհնար է: Բայց ինչպես ասում են՝ հույսը վերջում է մահանում: Մնանք հույսով»: 

Նա նշել է, որ սա ֆուտբոլ է, և հոգեբանական առումով շատ բարդ է, երբ թիմը երկրորդ րոպեին գոլ է բաց թողնում. «Այնուհետև թիմը կարծես սկսեց վերականգնվել, բայց հանկարծ պարզ սխալ, ու 0-2: Հետո արդեն շատ բարդ էր վերականգնվելը: 0-3-ից հետո գոլ խփեցինք, և կարծես թե ինչ-որ շարժ նկատվեց խաղում: Իսկ չորրորդ գոլը կարելի է ասել կոտրեց մեր թիմի ողնաշարը: Միակ ելքն այն է, որ պիտի փորձենք նման տարրական սխալներ այլևս թույլ չտալ: Ամենակարևորն այն է, որ բոլոր ֆոտբոլիստները սկսկեն իրենց վրա աշխատել: Խաղից հետո մարզիչը կարող է պատասխանել լրագրողների հարցերին, դա նրա գործն է, բայց ժամանակն է, որ ֆուտբոլիստները նույնպես պատասխանատվություն վերցնեն իրենց վրա»:

Հարցին, թե հոգեբանորեն ի՞նչ վիճակում եք գտնվում և արդյոք կարո՞ղ եք հոգեբանորեն պատրաստել տղաներին Ղազախստանի դեմ խաղին, Ա. Պետրոսյանն ասել է. «Որպես մարզիչ՝ սա իմ ամենացավալի պարտությունն էր: Այլընտրանք չունենք: Պարտավոր ենք վերականգնվել և դրական արդյունքով ավարտենք այս ընտրական փուլը»:

Պատասխանելով  հարցին, թե կարելի՞ է այս կազմի հետ հաջորդ ընտրական փուլի համար հույսեր կապել,  Հայաստանի ազգային հավաքականի գլխավոր մարզիչն ասաց. «Ոչ։ Իմ կարծիքով մեր թիմին «թարմություն» է պետք: Նայում եմ մեր մինչև 21 տարեկանների հավաքականին, և, ինչպես գիտեք, այնտեղ հիմնականում խաղում են Առաջին խմբի ֆուտբոլիստներ: Միակ մեր ելքը տեսնում եմ դրսից նոր ֆուտբոլիստներ բերելն է: Այս կազմով բարդ կլինի պայքարել անգամ Ազգերի Լիգայում: Ունենք շատ տաղանդավոր և երիտասարդ ֆուտբոլիստներ, բայց աճ չի նկատվում նրանց մոտ: Միգուցե բավարարվում են, որ խաղում են Բարձրագույն խմբում կամ մինչև 21 տարեկանների հավաքականում: Կարծում եմ, որ ֆուտբոլիստն է իր աճի համար պատասխանատու: Նրանք պետք է լավ խաղան, աճ գրանցեն, նոր մենք նրանց հրավիրենք հավաքական»: