Ձեր վստահելի աղբյուրը

Ընդդեմ կանանց նկատմամբ բռնության կոալիցիան արդարադատության նախարար Դավիթ Հարությունյանին և  արդարադատության նախարարի տեղակալ Վիգեն Քոչարյանին ուղղված կոչ է հղել:

Նրանք պաշտոնյաներին կոչ են անում հանդես գալ հանրային դիրքորոշմամբ և ներկայացնել «Ընտանեկան բռնության կանխարգելման և ընտանեկան բռնության ենթարկված անձանց պաշտպանության մասին»  ՀՀ օրենքի նախագիծը՝ մարդու իրավունքների պաշտպանության և այդ նպատակով անհրաժեշտ մեխանիզմների ներդրման տեսանկյունից։

«Ինչպես նաև, հերքել այն բոլոր հանրային գիտակցոության մեջ վախ և անվստահություն առաջացնող թեզերը, որոնք աղերսներ չունեն այս նախագծի հետ»,-ասված է կոալիցիայի տարածած կոչում:

«Ընդդեմ կանանց նկատմամբ բռնության» կոալիցիան գտնում է, որ հանրային իրազեկման և «Ընտանեկան բռնության կանխարգելման և ընտանեկան բռնության ենթարկված անձանց պաշտպանության մասին»  ՀՀ օրենքի նախագծի վերաբերյալ իրական ու ճշմարտացի տեղեկատվություն տալը բխում է պետության պարտավորություններից և այն հենց այս պահին պետք է անհապաղ իրագործել։

«Հակառակ դեպքում հանրային տարբեր խմբերում տարածվում է տգետ ապատեղեկատվություն, ինչն առավել խոցելի է  դարձնում օրենքի ընդունման հեռանկարը»,-ասված է տարածած հայտարարության մեջ:

«Ընդդեմ կանանց նկատմամբ բռնության» կոալիցիայի անդամ են
«Կանանց իրավունքների կենտրոն» ՀԿ-ն,  «Կանանց աջակցման կենտրոն» ՀԿ-ն, «Կանանց ռեսուրսային կենտրոն» ՀԿ-ն, «Հասարակություն առանց բռնության» ՀԿ-ն,
«Սեռական բռնության ճգնաժամային կենտրոն» ՀԿ-ն, «Հանրային տեղեկատվության և գիտելիքի կարիք»  ՀԿ-ն,  «Իրական աշխարհ, իրական մարդիկ» ՀԿ-ն.
«Դիսըբիլիթի ինֆո» տեղեկատվական ՀԿ-ն,  «Սպիտակի Հելսինկյան խումբ» ՀԿ-ն.  
«Ագաթ» ՀԿ-ն:

Նշենք, որ երեկ կառավարության նիստի ավարտից հետո Դավիթ Հարությունյանը խոսեց նախագծի մասին: