Ձեր վստահելի աղբյուրը

«Հանրապետական հիվանդանոցում նույն օրը երկու նորածինների արյան վարակում ստանալու դեպքերում ներհիվանդանոցային ինֆեկցիայի փաստ չի ֆիքսվել»,- այսօր մամուլի ասուլիսի ժամանակ հայտարարեց առողջապահության նախարար Լևոն Ալթունյանը՝ պատասխանելով լրագրողների հարցին, թե արդյոք դեպքն ուսումնասիրել է նախարարությունը և պատասխանատվություն կրողներ եղա՞ն, թե ո՞չ։

Հիշեցնենք, որ ԱԺ-ում 2017 թվականի պետական բյուջեի քննարկման ժամանակ լրագրողների հետ զրույցում առողջապահության նախարար Լևոն Ալթունյանն ասել էր. «Ես մեկ-երկու մահացած ծննդկանի դեպքով չեմ զբաղվում, դրանով զբաղվում են դատական մարմինները: Իմ համակարգը ամբողջ համակարգն է, ոչ թե մեկ-երկու բողոքավոր ծննդկանի բարեկամները։ Հասկացեք դա վերջապես: Մահվան դեպքում զբաղվում է դատավորը, մորգը…»:

Ահա Ձեզ «ամբողջ համակարգ», զբաղվու՞մ եք:

«Ինձ կարող են մեղադրել մասնագիտական գաղտնիք տարածելու մեջ, բայց երկու մայրն էլ ունեին ներարգանդային ինֆեկցիա մինչև ծննդաբերելը։ Երկու ծնունդն էլ վաղաժամ է եղել, այսինքն եթե նույնիսկ բժիշկները նշանակել են ներարգանդային ինֆեկցիայի բուժում ամբուլատոր ձևով, ուղղակի ժամանակ չի եղել այդ բուժումը հասցնել ավարտին։ Այդ իսկ պատճառով ծնունդը ինֆեկցված է եղել։ Պետք է ասել, որ ի շնորհիվ բժիշկների երկու դեպքում էլ մենք ունեցանք դրական ելք և երեխաներն այսօր ողջ առողջ են»,- ասաց նախարարը։

Պետք է նշել, որ երկու մայրիկներն էլ հազիվ իրենց երեխաներին փրկեցին՝ տեղափոխելով այլ հիվանդանոց։ Ու թե որտեղից է նախարարը «քաղում» իր տեղեկությունները՝ զարմանալի է, նկատի ունենալով ծնողների խոսքը.

«ՀՀ ԱՆ-ին բողոք նամակ եմ գրում և պատիժ պահանջում։
Նամակ եմ ստանում, որ հանձնաժողով է ստեղծվել դեպքի կապակցությամբ։ Ինձ զանգահարում է նախարարության Մոր և մանկան բաժնի պետը, նախ փորձում է օգնություն առաջարկել երեխայի հետագա բուժ․հսկողության հետ կապված, հրաժարվում եմ։ Ապա,ասում, թե ինչու ենք շարունակում բողոքել։ Բացատրում եմ, որ հակասանիտարական վիճակ է, գերծանրաբեռնված է բաժանմունքը, բժիշկները անմարդկային են։

Ինձ հարցնում է , թե կարող է իմանամ թե ինչպես է 3 օր շարունակ երեխայիս կպած, նույն կյուվեզի մեջ պառկած երեխայի առողջությունը, պատասխանում եմ, որ դա իրենք պետք է իմանան, ոչ թե ես։

Իսկ ապա հարցնում եմ, թե կա՞ նման մոտեցում , որ ենթադրյալ ինֆեկցված երեխայի կողքին առողջ երեխա պառկեցնեն, որ 3 քույր խնամի 40-ից ավելի տարբեր խնդիրներ ունեցող վաղաժամ ծնված երեխաների՝ պատասխան չկա։

Փորձում է համոզել, թե խնդիրը մայրերի մեջ է երևի, ընդդիմանում եմ, քանզի ողջ ընթացքում որևէ խնդիր չեմ ունեցել, բոլոր անալիզները նորմայի մեջ են եղել, ինֆեկցիայի մասին խոսելն ավելորդ է, 3-րդ կեսարյանից հետո անգամ չեմ ջերմել։ Հասկանում եմ ,որ հող է նախապատրաստում առաջիկա նախարարության պատասխանի համար։ 

Գալիս է նախարարության պատասխանը, լղոզված․․․Մեջբերում եմ՝«ծննդալուծումը կեսարյան հատման ճանապարհով եղել է հիմնավորված, ինֆեկցվածությունը ժամանակին է հայտնաբերվել, իսկ Հանրապետական ծննդատանն ու Մուրացան կլինիկայում թերություններ չեն հայտնաբերվել»։

Ինչ կապ ունի Մուրացան կլինիկան, նրանք են փրկել երեխայիս կյանքը։ Ընդամենը 2 օրվա անալիզները արդյունքները այնպես են գրել, ի դեպ՝ հանձնաժողովով, որ 11,07,17- դրությամբ շատ վատ է, ախտորոշումը սեպսիս, հետո նույն օրվա դրությամբ՝ շատ լավ ցուցանիշներ, հետո 12,07,17 դրությամբ՝ լրիվ առաջին ցուցանիշները, բացարձակապես նույնը։

Հիմա ինչպես չասեմ՝ հարգելի հանձնաժողովի անդամներ, նկարած եզրակացությունն ու ցուցանիշները, բարի եղեք, կարդացեք,նոր եզրակացության տակ ստորագրեք, որ մարդկանց ծիծաղ չառաջանա․․․

Եթե մեր ԱՆ շարունակում է մնալ այդպիսի կառույց, դեռ մեր իրականության մեջ կշարունակեն բազմանալ Սերինեներ, Անահիտներ, Շուշանիկներ․․․դեռ հաշմանդամ երեխաներ շատ կունենանք, քանզի ջայլամային քաղաքականությունը շարունակվում է»։ (Լուիզա Գրիգորյան)

Ու մի հարց էլ՝ ո՞վ շահ ունի ստելուց։ Ծնողները՝ հաստատ չէ։ Սկզբունքորեն՝ ԱՆ-ն էլ պիտի շահ չունենար, բայց... 

Իսկ ընդհանուր՝ նախարարի խոսքով՝ ներհիվանդանոցային ինֆեկցիայի հարցը Հայաստանում բավականին լուրջ է դրված. «Մենք չունենք մեծ քանակով ներհիվանդանոցային ինֆեկցիաներ՝ ի շնորհիվ լայնածավալ անտիբիոտիկների օգտագործման, բայց այստեղ մենք շատուշատ անելիքներ ունենք։ Սրա հետ կապված զրուցել ենք և հիվանդությունների կանխարգելման կենտրոնի ղեկավարության ու անձնակազմի հետ, և հիմա ձևավորվող տեսչական մարմնի ղեկավարության հետ»։