Ձեր վստահելի աղբյուրը

ՊՊԾ գնդի գրավմանը մասնակցած խմբից 14 անդամի գործից անջատված  մասը  մակագրվել է Էրեբունի և Նուբարաշեն վարչական շրջանների ընդհանուր իրավասության դատարանի դատավոր Մեսրոպ Մակյանին: Այս մասին տեղեկանում ենք Դատական տեղեկատվական համակարգից:

Նա այսուհետ իրականացնելու է Պավել Մանուկյանի, Վարուժան Ավետիսյանի, Մխիթար Ավետիսյանի, Արայիկ Խանդոյանի, Գագիկ Եղիազարյանի, Արմեն Բիլյանի, Արեգ Կյուրեղյանի, Սմբատ Բարսեղյանի, Սեդրակ Նազարյանի, Էդվարդ Գրիգորյանի դատաքննությունը:

Հիշեցնենք, որ ՊՊԾ գնդի գրավմանը մասնակցած խմբից 14 անդամների գործը կիսվելու մասին հայտարարվել էր հոկտեմբերի 4-ին: Սեպտեմբերի 28-ին հայտարարվել էր ՊՊԾ գնդի գրավմանը մասնակցած խմբից 18 անդամի գործն անջատելու մասին: Ամբաստանյալներից  11-ի՝  Արամ Մանուկյանի, Հովհաննես Հարությունյանի, Թաթուլ Թամրազյանի, Արամ Հակոբյանի, Տիգրան Մանուկյանի, Արայիկ Հակոբյանի, Վարդան Գերավետյանի, Մարտիրոս Հակոբյանի, Սերգեյ Կյուրեղյանի, Գևորկ Իրիցյանի, Թորոս Թորոսյանի մասով  անջատված քրեական գործը մակագրվել էր Էրեբունի և Նուբարաշեն վարչական շրջանների ընդհանուր իրավասության դատարանի դատավոր  Արթուր Օհանյանին:

ՊՊԾ գնդի գրավման գործով երկու դատաքննությունն էլ մինչև անջատվելն իրականացրել է դատավոր Արտուշ Գաբրիելյանը: Այսուհետ նա իրականացնելու է միայն Արմեն Լամբարյանի, Աշոտ Պետրոսյանի, Կարո Եղնուկյանի, Խաչատուր Գիչյանի (14 անդամի գործից անջատված 4 անդամի) և Տիգրան  Սարգսյանի,  Հովհաննես  Վարդանյանի, Արթուր  Մելքոնյանի, Արթուր  Սողոմոնյանի, Գառնիկ  Հովակիմյանի, Մանվել  Աթոյանի, Վարդգես  Գևորգյանի (18 անդամի գործից անջատված 7 անդամ) մասով դատաքննությունը:

Այսինքն, ՊՊԾ գնդի գրավման գործը կքննվի 3 տարբեր վարույթներում տարբեր դատավորների նախագահությամբ՝  Մեսրոպ Մակյան, Արթուր Օհանյան, Արտուշ Գաբրիելյան:

Նշենք, որ գործում ներգրավված փաստաբաններից Երվանդ Վարոսյանն ավելի վաղ լրագրողների հետ զրույցում ասել էր, գործերի կիսման արհեստական գործընթացը ոչ մի լավ բանի չի հանգեցնելու. «Դրանից արդարադատությունը տուժելու է:  Անհնար է նույն գործը նույն ապացույցների շրջանակում, նույն տուժողներով, նույն վկաներով, նույն ամբաստանյալներով երեք տարբեր տեղեր քննել»: